ނިގާބު އަޅާ ބޭފުޅުންނަށް ޝަރުއީ ދާއިރާގައި މަސައްކަތްކުރެވޭނެ ކަމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން ނިންމައިފި އެވެ.
މި ނިންމުމާ ގުޅިގެން ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ވަނީ ޝަރުއީ ދާއިރާގައި މަސައްކަތްކުރާ މުވައްޒަފުންގެ ހެދުން އެޅުމާ ގުޅޭ ގަވާއިދުތައް އިސްލާހުކޮށް ސާކިއުލާއެއް ފޮނުވައިފަ އެވެ.
ޝަރުއީ ދާއިރާގައި މަސައްކަތްކުރާ މުވައްޒަފުންގެ ހެދުން އެޅުމުގެ އުސޫލުތަކަށް އިސްލާހު ގެނައުމުގެ ކުރިން އެ މާއްދާގައި އޮންނަ ގޮތުން، ހިދުމަތް ލިބިގަންނަން އިދާރާތަކަށްދާ ފަރާތްތަކަށް އެ މުވައްޒަފަކީ ކާކުކަން އެނގެން ޖެހޭނެ ކަމަށް ވަނީ ބަޔާންކޮށްފަ އެވެ. މީގެ އިތުރުން ރަސްމީ ގަޑީގައި މުވައްޒަފުން ހެދުން އަޅަންޖެހޭނީ ކާކުކަން ރަނގަޅަށް އެނގޭ ގޮތަށް ކަމަށް ވެސް އެ މާއްދާގައި ބަޔާންކޮށްފައިވެ އެވެ.
އެ މާއްދާއަށް އަލަށް ގެނެވުނު އިސްލާހާއިއެކު ނިގާބު އަޅާ މުވައްޒަފުންނަށް ވަޒީފާ އަދާ ކުރުމަށް އެއްވެސް ހުރަހެއް ނެތްކަމަށް ވަނީ ބަޔާންކޮށްފަ އެވެ. އެހެންނަމަވެސް އެ މުވައްޒަފަކީ ކާކުކަށް ކަށަވަރުކުރަން ޖެހިއްޖެ ހާލަތެއްގައި، އެ މުވައްޒަފެއްގެ މޫނު، އެ މުވައްޒަފަކު މަސައްކަތްކުރާ އިދާރާގެ އަންހެން މުވައްޒަފަކަށް ދައްކަންޖެހޭނެކަމަށް އަލަށް ގެނެވުނު އިސްލާހުގައި ވަނީ ބަޔާންކޮށްފަ އެވެ.
އަލަށް ގެނެވުނު އިސްލާހާ އެއްގޮތަށް މިއަދުން ފެށިގެން އަމަލުކުރުމަށް ޑީޖޭއޭއިން ވަނީ ކޯޓުތަކާއި އިދާރާތަކަށް އަންގައިފަ އެވެ.
މީގެ ކުރިން ބައެއް ކޯޓުތަކުގައި ނިގާބު އަޅާ ބޭފުޅުންނަށް ވަޒީފާ ނުދޭތީ އެކަމުގެ ކަންބޮޑުވުން ބައެއް ފަރާތްތަކުން ފާޅުކޮށްފައިވެ އެވެ.
