ހަތިޔާރުތައް ޙަވާލު ނުކުރާނެ ކަމަށް ވިދާޅުވެ އެމެރިކާ އާއި އިސްރާއީލަށް ލުބުނާނުގެ ހިޒްބުاللهގެ ސެކްރެޓަރީ ޖެނެރަލް ނަޢީމް ޤާސިމް ވަރުގަދަ އިންޒާރެއް ދެއްވައިފިއެވެ. ނާޢިމް ޤާސިމް މި އިންޒާރު ދެއްވީ، މަކަރުވެރި ހީލަތްތެރި ރޭވުމަކުން އެމެރިކާއިން ލުބުނާނު ސަރުކާރާއި ގުޅިގެން ހިޒްބުاللهގެ ހަތިޔާރުތައް އަތުލައި މެދުއިރުމަތީގެ ފުރިހަމަ ކޮންޓުރޯލް އިސްރާއީލަށް ދިނުމަށް ހަދާފައިވާ ޕްލޭނުގެ ތެރެއިން ލުބުނާނު ސަރުކާރުން ހިޒްބުالله އާއި ދެކޮޅަށް މަސައްކަތް ފެށުމާއި ގުޅިގެން ދެއްވި ތަޤްރީރެއްގައެވެ.

ހިޒްބުالله އިން އިތުރަށް އިންޒާރު ދެއްވި ގޮތުގައި އެމެރިކާގެ ނުފޫޒުގެ ދަށުން ހަތިޔާރު ނައްތާލުމަށް ބާރުއަޅަން ކުރާ މަސައްކަތްތަކުގެ ސަބަބުން އުފެދޭނީ އެތެރޭގެ ހަމަނުޖެހުންތަކާއި ދާޚިލީ ހަނގުރާމައެއް ކަމަށާއި، ނަފްސު ސަލާމަތް ކުރުމަށްޓަކައި އެމެރިކާގެ ކުރިމަތީގައި ވެސް އަދި އެއްވެސް ބައެއްގެ ކުރިމަތީގައި ހިޒްބުالله އިން ކުޑަކަކުލެއް ނުޖަހާނެ ކަމަށެވެ.

އެމެރިކާ އާއި އިސްރާއީލުން އެދިގެން ލުބުނާނު ސަރުކާރުން ވަނީ ހަތިޔާރު ނައްތާލުމަށް ހިޒްބުاللهގެ ލީޑަރުންނަށް އަންގައި މި އަހަރުގެ ޑިސެމްބަރު މަސް އަންނަންވާއިރަށް އެއްވެސް ހަތިޔާރެއް ހިޒްބުاللهގެ އަތުގައި ހުރެގެން ނުވާނެ ކަމަށް އަންގާފައެވެ.

ރައްދުގައި ނަޢީމް ޤާސިމް ވިދާޅުވީ އެމެރިކާއާއި އިސްރާއީލުގެ މަސްލަޙަތު ޙިމާޔަތް ކުރުމަށް ހިޒްބުالله ގެ ހަތިޔާރުތައް ނައްތާލުމަށް މަޖުބޫރެއް ނުކުރެވޭނެ ކަމަށެވެ.

މެދުއިރުމަތީގައި އެމެރިކާ އާއި އިސްރާއީލުން ހޯދަން އުޅޭ ކޮންޓުރޯލާއި ދެކޮޅަށް މަސައްކަތްކުރާ ހިޒްބުﷲގެ ހަތިޔާރުތައް އަތުލުމަށް ލުބުނާނު ސަރުކާރުން މަސައްކަތް ފެށުމާއި އެކު ހިޒްބުﷲގެ ލީޑަރު ވިދާޅުވީ ހަތިޔާރު ދެމިއޮތީ އެ މީހުންގެ ނަފްސާއި ބިމާއި ކަރާމާތް ރައްކާތެރި ކުރުމަށް ކަމަށާއި، ހަތިޔާރުތައް އަތުލުމަށް ލުބުނާނު ސަރުކާރުން ނިންމި ނިންމުން އަނބުރާ ގެންދިޔުމަށެވެ.

"ހަތިޔާރުތައް ދެމިއޮތީ އަހަރެމެންގެ ނަފްސާއި، އަހަރެމެންގެ ޝަރަފާއި، ބިމާއި، ކަރާމާތާއި، ދަރިންގެ މުސްތަޤްބަލުގައި" ޤާސިމް ވިދާޅުވީ އެ ޖަމާޢަތުގެ ހަތިޔާރު އަތުލުމަށް މަސައްކަތްކުރާ މީހުންނަކީ، ޙަޤީޤަތުގައި ލުބުނާނުގެ ދިފާޢީ ޤާބިލުކަން ނަގާލުމަށް މަސައްކަތްކުރާ ބައެއް ކަމަށެވެ. "މި ހަތިޔާރުތައް ނަގަން ބޭނުންވާ މީހަކު ބޭނުންވަނީ އަހަރެމެންގެ ނަފްސުތައް ނަގާލަން،" ސަރުކާރުގެ ނުވަތަ ބައިނަލްއަގްވާމީ ޕްރެޝަރަށް އެ ޖަމާއަތުން ބޯނުލަނބާނެ ކަމަށް ވަޢުދުވެ އެނާ އިންޒާރު ދެއްވިއެވެ.

އެމެރިކާއިން ބުނާ ގޮތެއް ހަދައި ވަކި އޮނިގަނޑެއްގެ ތެރެއިން ހިޒްބުالله އިން ހަތިޔާރު ނައްތާލަން ފަށައިފިނަމަ ލުބުނާނުގެ ދެކުނުން އިސްރާއީލް ސިފައިން މަރުހަލާތަކަކަށް ބަހާލައިގެން ފޭބުމުގެ މަސައްކަތް ފަށާފާނެ ކަމަށް އިސްރާއީލުން މި ހަފްތާގައި އިޝާރާތްކޮށްފައިވެ އެވެ.

އިސްރާއީލާއި އެމެރިކާގެ މި ވާހަކަތައް ލުބުނާނުގެ މިހާރުގެ ސަރުކާރުން ޤަބޫލުކުރެއެވެ.