އެސްޓީއޯ އިން ހުޅުމާލޭގައި އިމާރާތް ކުރަން ފަށާފައިވާ ސިޓީ ހޮޓާ އިމާރާތުގައި މީޑިއާތަކަށް ހާއްސަ މީޑިއާ ވިލެޖާ އެކު، އާ ފަސް ތަރީގެ ހޮޓަލެއް ހެދުމަށް އެޗްޑީސީން ބަޔަކާ އެކު އެއްބަސްވުމެއްގައި ސޮއިކޮށްފި އެވެ. 

އެ އިމާރާތުގައި މީޑިއާ ވިލެޖުގެ އިތުރުން ތަރިކަ ކޮލެޖާއި އެމްއެންޔޫ މެޑިކަލް ސްކޫލާއި ޔޫތު ސެންޓަރަށް ހާއްސަ ޖާގައެއް ކަނޑައަޅާނެކަމަށް މައުލޫމާތު ލިބެ އެވެ. އެ ތަންތަން ނިންމަން ފަސް މަސް ދުވަސް ވަނީ ދީފަ އެވެ. އެ ހަތަރު ތަނަށް ދޭ ޖާގަ ހެދުމަށް ހަތް މިލިއަން ޑޮލަރު ހަރަދު ކުރާނެކަމަށް ވެސް މައުލޫމާތު ލިބެ އެވެ.

ހޮޓާ އެއްކޮށް ނިންމައި ހުޅުވަން ކަނޑައަޅާފައި ވަނީ ކުރިއަށް އޮތް 12 މަސް ދުވަހުގެ މުއްދަތުގަ އެވެ.

އެ ޕްރޮޖެކްޓަށް ބޭނުންވާ ބިން ހުޅުމާލެ އިން 2007 ވަނަ އަހަރު ހޯދައި އެމެރިކާގެ ކާލްސަން ގުރޫޕާ އެކު 2011 ގައި ޕާޓްނާޝިޕް އެއްބަސްވުމެއް ވެސް ހެދި އެވެ. އަދި 34 މިލިއަން ޑޮލަރު ހަރަދު ކޮށްގެން 250 ކޮޓަރި ހިމެނޭ ގޮތަށް "ރެޑިސަން ބްލޫ ހޮޓެލް" ގެ ނަމުގައި އެ ތަން ތަރައްގީ ކުރަން ފެށި ނަމަވެސް އެކި ކަންކަން ކުރިމަތިވެ އެ ހޮޓާ ވިއްކާލަން 2018 ގައި އެސްޓީއޯ އިން ނިންމި އެވެ.

ނަމަވެސް އޭގެ ފަހުން އެ ހޮޓަލާ މެދު ސަރުކާރުން ގޮތެއް ނިންމުން ދިގުލައިގެން ދިޔަ ނަމަވެސް އެސްޓީއޯއާ ނުގުޅޭ ވިޔަފާރިތަކުން ދުރަށް ދާން އެ ކުންފުނީގެ މިހާރުގެ މެނޭޖުމަންޓުން މިދިޔަ އަހަރު ނިންމުމާ އެކު، އެ ހޮޓާ ހިންގާނެ އާ ބަޔަކު ހޯދުމުގެ މަސައްކަތްތައް މި ސަރުކާރުން ފެށި އެވެ. އޭގެ ނަތީޖާއަކީ ދުބާއީގެ ޑީޕްސީފުޑް ކޮމްޕެނީއާ ވާހަކަ ދައްކައި އަލުން މަޝްރޫއު ކުރިއަށް ގެންދަން ކަނޑައެޅުން ކަމަށް އެޗްޑީސީން ބުންޏެވެ.

އަދި އެ ޕްރޮޖެކްޓާ އެކު، އެޗްޑީސީ އަށް ބިމުގެ އަގުގެ ގޮތުގައި 11 މިލިއަން ޑޮލަރު (170 މިލިއަން ރުފިޔާ) ލިބޭނެ އެވެ. އަދި ކޮންމެ އަހަރު ކުލީގެ ގޮތުގައި 14.4 ރުފިޔާ ލިބޭނެ އެވެ. ޓެކްސްގެ ގޮތުގައި ދައުލަތަށް އަހަރަކު 2.5 މިލިއަން ޑޮލަރު (39 މިލިއަން ޑޮލަރު) ލިބޭނެ ކަމަށް އެޗްޑީސީން ލަފާކުރެ އެވެ.

އެސްޓީއޯ އިން ހުޅުމާލޭގައި ހޮޓަލެއް އިމާރާތް ކުރަން މީގެ 18 އަހަރު ކުރިން ނިންމީ ރާއްޖެ އަށް އެތެރެކުރާ ކާޑާއި ތެލާއި އަދި އެހެނިހެން ބާވަތްތަކުގެ މުދާ ގަންނަން ބޭނުންވާ ޑޮލަރު ހޯދުމަށެވެ.