މާލޭ މަސްމާރުކޭޓުގައި ގަވާއިދާ ހިލާފަށް ހިންގަމުންދާ ވިޔަފާރިތައް ހުއްޓުވުމަށް މާލޭ ސިޓީ ކައުންސިލުން މަސައްކަތް ފަށައިފި އެވެ.

މިކަމާ ގުޅޭގޮތުން މިއަދު މާލޭ ސިޓީ ކައުންސިލުން ނެރުނު އިއުލާނުގައި ބުނެފައިވަނީ، މާލޭ މަސްމާރުކޭޓުގެ ފުރަތަމަ އަދި ދެވަނަ ފަންގިފިލާގައި އެއްވެސް ރަސްމީ އެއްބަސްވުމެއް ނެތި، ގަވާއިދާ ހިލާފަށް ހިންގަމުންދާ ފިހާރަތަކާއި، ގުދަންތަކާއި އަދި އެހެނިހެން ބޭނުންތަކަށް ބޭނުންކުރަމުންދާ ތަންތަން ހުރިކަން ފާހަގަކުރެވިފައިވާ ކަމަށެވެ.

މިފަދަ ތަންތަނަކީ އެއްބަސްވުމެއްގެ ދަށުން ހިންގާ ތަނެއް ކަމުގައިވާނަމަ، އަންނަ ހަފްތާގެ ބުރާސްފަތި ދުވަހުގެ ކުރިން އެ އެއްބަސްވުން މާލޭ ސިޓީ ކައުންސިލަށް ހުށަހެޅުމަށް ކައުންސިލުން ވަނީ އަންގައިފަ އެވެ.

މާލޭ ސިޓީ ކައުންސިލުން ކުރި އިއުލާނުގައި އިތުރަށް ބުނެފައިވާ ގޮތުގައި، މި މުއްދަތުގެ ތެރޭގައި ލިޔުން ހުށަނާޅާއިފި ނަމަ، އެފަދަ ތަންތަނަކީ ބޭނުން ނުކުރާ ތަންތަން ކަމުގައި ބަލައި، އެ ތަންތަން ކައުންސިލްގެ ބެލުމުގެ ދަށަށް ގެނެވޭނެއެވެ. މީގެ އިތުރުން، ކައުންސިލްގެ ބެލުމުގެ ދަށަށް ގެނެވޭ ފިހާރަތަކާއި، ގުދަންތަކާއި އަދި އެހެނިހެން ތަންތަން ސާފުކުރުމުގެ މަސައްކަތް ކުރާއިރު، އެ ތަންތަނުގައި ބަހައްޓާފައި ހުންނަ ތަކެއްޗަކީ ބޭނުން ނެތިގެން ދޫކޮށްލާފައިވާ ތަކެތި ކަމުގައި ބަލައި، ކުނީގެ ގޮތުގައި ނައްތާލެވޭނެ ކަމަށްވެސް ކައުންސިލުން ވަނީ އަންގައިފަ އެވެ.

މާލޭ މަސްމާރުކޭޓުގައި ގަވާއިދާ ހިލާފަށް ހިންގަމުންދާ ވިޔަފާރިތައް ހުއްޓުވުމަށް މާލޭ ސިޓީ ކައުންސިލުން ނިންމާފައިވާއިރު، އެތަން ތަރައްގީކުރުމުގެ މަޝްރޫއު ކުރިއަށް ގެންދިއުމަށްޓަކައި މިލިއަން ޑޮލަރުގެ ދެ އެއްބަސްވުމެއްގައި ސޮއިކުރެވިފައިވާ ކަމަށާ، އޭގެތެރެއިން ރަނގަޅީ ކޮން އެއްބަސްވުމެއްކަން އެނގި ވަޑައިނުގަންނަވާކަމަށް މާލޭ ސިޓީ ކައުންސިލްގެ މޭޔަރު އާދަމް އާޒިމް ވަނީ ވިދާޅުވެފަ އެވެ.