ދުނިޔޭގެ އެންމެ މަޝްހޫރު ސްޓްރީމިން ޕްލެޓްފޯމް ނެޓްފްލިކްސްގެ ރެކޯޑްތައް މުގުރާލި "ވަން ޕީސް" ސީރީޒްގެ މަޝްހޫރު ތަރި ޓެޒް ސްކައިލާ، ދިވެހިރާއްޖޭގެ ފަތުރުވެރިކަން އިޝްތިހާރު ކުރުމުގެ ބައިނަލްއަގުވާމީ މޫނަކަށް، ނުވަތަ ގްލޯބަލް އެމްބެސަޑަރަކަށް ވިޒިޓް މޯލްޑިވްސްއިން ހަމަޖައްސައިފި އެވެ.

"ވަން ޕީސް" ސީރީޒްގައި "ސްޓްރޯ ހެޓް ޕައިރޭޓްސްގެ ފަންނުވެރި ކައްކާ، ސަންޖީގެ ރޯލު އަދާކުރާ ސްކައިލާ، ދިވެހިރާއްޖޭގެ ފަތުރުވެރިކަން ކުރިއެރުވުމަށް މުހިންމު ދައުރެއް އަދާކުރާނެކަމަށް ވިޒިޓް މޯލްޑިވްސްއިން ފާހަގަކުރި އެވެ. އެގޮތުން، ސްކައިލާގެ އެމްބެސެޑާޝިޕްގެ ދަށުން، ދިވެހިރާއްޖޭގެ ހިތްގައިމު ގުދުރަތީ ރީތިކަމާއި، ސަގާފީ މުއްސަނދިކަމާއި، ދެމެހެއްޓެނިވި ފަތުރުވެރިކަމުގެ އިތުރުން، ހާއްސަކޮށް އެޑްވެންޗާ ފަތުރުވެރިކަމުގެ ފުރުސަތުތައް ބައިނަލްއަގުވާމީ ފެންވަރުގައި ޕްރޮމޯޓުކުރެވިގެންދާނެ އެވެ.

އެގޮތުން، "ވަން ޕީސް" ސީރީޒް ވެގެންދިޔައީ ނެޓްފްލިކްސްގެ ގިނަ އަދަދެއްގެ ރެކޯޑް މުގުރާލައި، 84 ގައުމެއްގައި އެންމެ ގިނައިން ބަލާ ޝޯ ތަކު ތެރެއިން އެއް ޝޯއަށެވެ. މިއީ "ވެޑްނެސްޑޭ" އަދި "ސްޓްރޭންޖާ ތިންގްސް" އިން ކުރިން ހޯދާފައިވާ ރެކޯޑުތައް މުގުރާލި ކާމިޔާބީއެކެވެ. މި ސީރީޒްއަކީ، ފާޑުކިޔުންތެރިންނާއި ފޭނުންގެ މެދުގައި މިހާތަނަށް އެންމެ ރަނގަޅު ލައިވް-އެކްޝަން އެނިމޭ އެޑަޕްޓޭޝަންތަކުގެ ތެރެއިން އެއް އެޑަޕްޓޭޝަން ކަމުގައި ފާހަގަކުރެވެ އެެވެ.

އިންސްޓަގްރާމްގައި 1.8 މިލިއަނަށްވުރެ ގިނަ ފޮލޯވަރުން ތިބި ސްކައިލާގެ ސޯޝަލް މީޑިއާ ބޭނުންކޮށްގެން، ވިޒިޓް މޯލްޑިވްސްއަށް އާ ބައިނަލްއަގުވާމީ އޯޑިއަންސްއަކާ ހަމައަށް ވާސިލުވުމުގެ ފުރުސަތު ލިބިގެންދާނެކަމަށް އެ ކުންފުނިން ބުންޏެވެ. އާންމުކޮށް ޕޯސްޓަކަށް އެވްރެޖްކޮށް 45،000 ލައިކް އަދި 300 އަށްވުރެ ގިނަ ކޮމެންޓް ލިބެމުންދާ ސްކައިލާގެ ސޯޝަލް މީޑިއާގެ ސަބަބުން ދިވެހީންގެ އާދަކާދައާއި، ރާއްޖޭގެ ކަލިނަރީ އަދި އެޑްވެންޗާ ފަތުރުވެރިކަމުގެ ވާހަކަތައް، ދިވެހިވަންތަކަމާއި ޝައުގުވެރިކަމާއެކު ދައްކުވައިދިނުމުގެ ފުރުސަތު ލިބިގެންދާނެކަމަށް ވިޒިޓް މޯލްޑިވްސްއިން ފާހަގަކުރި އެވެ.

މީގެއިތުރުން ވިޒިޓް މޯލްޑިވްސްއިން ބުނީ ސްކައިލާ ދިވެހިރާއްޖެއަށް ކުރުމަށް ހަމަޖެހިފައިވާ ދަތުރުގައި، ދިވެހިރާއްޖޭގެ މަޖާކަންތައްތަކާއި ކެއުމުގެ ދާއިރާ ދުނިޔެއަށް ދައްކުވައިދޭ މާކެޓިން ހަރަކާތްތަކުގައި އޭނާ ބައިވެރިވާނެކަމަށެވެ.