ޣައްޒާ ގައި ނުރައްކާތެރި ޤަތުލުޢާންމެއް ހިންގަން އިސްރާއީލުގެ ބައެއް ސިފައިން ދެކޮޅުހަދަމުންދާ ދަނޑިވަޅެއްގައި އެމެރިކާ އާއި ފުރާންސުން 700 ހަނގުރާމަވެރިން ގެންނަން ހައްދުފަހަަނަ އަޅާފައިވާ ޒައެނިސްޓް ބޮޑުވަޒީރު ނަތަންޔާހޫ މަޝްވަރާ ކޮށްފިއެވެ.
ޖެރޫސެލަމް ޕޯސްޓުން ބުނާ ގޮތުގައި ނަތަންޔާހޫ ބޭނުމީ ވޮލެންޓިއަރުންގެ ގޮތުގައި މަދުވެގެން 700 ހަނގުރާމަވެރިންނެވެ. އެ މީހުން ގެންނަނީ އެމެރިކާ އާއި ފުރާންސުން ރެކްރޫޓް ކޮށްގެންނެވެ.
ޚަބަރުތައް ބުނާ ގޮތުގައި މި 700 މީހުންނަކީ ނުރައްކާތެރި އަދި ލާއިންސާނީ ޖަރީމާތައް ހިންގުމުގައި ފަސްނުޖެހޭނެ މީހުންނެވެ.
ގާތްގަނޑަކަށް ދެއަހަރާއި ގާތްކުރަމުންދާ ޣައްޒާ ހަނގުރާމައިގައި އިސްރާއީލަށް މިހާރު ވަނީ އަސްކަރީ ސިފައިންގެ ވަރަށް ބޮޑު ދަތިކަމަކާއި ކުރިމަތިލާން ޖެހިފައި ކަމަށް ރިޕޯޓް ތަކުން ބުނެއެވެ. އަނެއްކޮޅުން ބަލާއިރު ހިބްރީ ޔުނިވާސިޓީން ކުރި ދިރާސާއަކުން ދައްކާ ގޮތުގައި އިސްރާއީލުން ޣައްޒާގައި ޙަރަކާތްތެރިވާ ސިފައިން ވަނީ ޙަމާސް ބަލި ނުކުރެވުމުގެ ސަބަބުންނާއި ގަދަބާރުން ވެސް ރަހީނުން މިނިވަން ނުކުރެވުމުގެ ސަބަބުން ސިފައިންގެތެރެއިން ގާތްގަނޑަކަށް %70 މީހުން މާޔޫސްވެ، ޣައްޒާއިން ފޭބުމަށް ނިންމާފައެވެ.
އިސްރާއީލުގެ ބައެއް ސިފައިންނާި ޙަވާލާދީ ނުރަސްމީ ޗެނަލްތަކުން ބުނާ ގޮތުގައި ދެއަހަރުވަންދެން ހުއްޓުމެއް ނެތި ހަނގުރާމަ ކޮށްގެން ވެސް ރަހީނުން މިނިވަން ނުކުރެވުމާއި ޣައްޒާއިން ޙަމާސްގެ ބާރު ކަނޑުވާލުމަށް ބޮޑެތި ގޮންޖެހުންތައް އެބަހުއްޓެވެ. ޚާއްޞަކޮށް ހަމާސް ޓަނަލް ނެޓްވޯކް ފަދަ ޓެކްޓިކަލް ގޮންޖެހުންތަކަކީ އިސްރާއީލަށް ކުރިމަތިވެފައިވާ އެންމެ ބޮޑެތި ހުރަސްތަކެވެ.
ޣައްޒާ ސުންނާފަތިކޮށްލުމަށް އެމެރިކާ އާއި ފުރާންސުން ޔަހޫދީ ވޮލެންޓިއަރުން ހޯދުމަށް ނަތަންޔާހޫ މަޝްވަރާ ކުރަމުންދާއިރު އެމެރިކާއިން ވެސް އަދި ފްރާންސުންވެސް މީޑިއާގައި މި ވާހަކަތައް ދޮގު ކޮށްފައެއް ނުވެއެވެ.
