ގައުމުގެ ކަންތައް ރަނގަޅުކުރަން ބޭނުންނަމަ މީޑިއާ އިސްލާހުވާންޖެހޭކަމަށް ދިއްގަރު ދާއިރާގެ މަޖިލިސް މެންބަރު އަދި މަޖިލީހުގެ ނައިބު ރައީސް އަހުމަދު ނާޒިމް ވިދާޅުވެއްޖެ އެވެ.
ނާޒިމް މިބީދައިން ވިދާޅުވެފައިވަނީ މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަންގެ ނަމުގައި މިއަދު މަޖިލީހަށް ހުށަހެޅި ބިލަށް ބަހުސްކުރައްވަމުން ދެއްކެވި ވާހަކަފުޅުގަ އެވެ
ނާޒިމް ވިދާޅުވެފައިވާ ގޮތުގައި މިހާރުގެ ހާލަތަށް ބަލާއިރު ފެންނަމުން ދަނީ އެއްވެސް ހިފެހެއްޓުމެއްނެތި އަދި އެއްވެސް އިމެއް ނެތި، މީހުންގެ އަބުރަށް އަރައިގަންނަ ތަންކަމަށާއި އާންމު މަސްލަހަތު ގެއްލުވާލާތަން ކަމަށެވެ. އަދި ކުދި ރަށްރަށާ ގައުމުގެ ވަކި ސަރަހައްދުތަކުގައިވެސް މަސްލަހަތު ގެއްލޭގޮތަށް މީޑިއާތަކުން ހަރަކާތްތެރިވަމުންދާކަމަށް ނާޒިމް ވިދާޅުވި އެވެ.
"އަޅުގަނޑު ގަބޫލުކުރާ ގޮތުގައި މިހާރު ރާއްޖޭގައި އޮޕަރޭޓްކުރާ މީޑިއާތަކަކީ ވަރަށް ތިލަކޮށް ވަރަށް ސާފުކޮށް ދަންނަވާކަމަށްވަންޏާ ޗެކްބުކް މީޑިއާއެއް ރާއްޖޭގައި މިއޮތީ. ފައިސާ ދިނީމާ ފައިސާ ދޭގޮތަކަށް ސުރުހީ ޖަހައިދޭނެ، 100 ޕަސެންޓް ސުރުހީ ނަގައިވެސް ދޭނެ."
ނާޒިމް ވިދާޅުވި އެވެ.
ނާޒިމް ވިދާޅުވެފައި ވަނީ މީޑިއާތަކަކީ ވަކި ބައެއްގެ ނުފޫޒުގެ ދަށުގަ ދަށުވެފަ ވަކި ބައެއްގެ އަތުގައި އޮންނަ އެއްޗަކަށްވެގެން ނުވާނެކަމަށެވެ. އަދިހަމައެހެންމެ، ޒިންމާދާރުކަމާއެކު ނޫސްވެރިކަން އަދާކުރާ ފަރާތްތަކަށް އެންމެ ފައިދާވާނެ ގޮތަކީ މިނިވަން މީޑީއާއެއް އޮވެ ޕްރޮފެޝަނަލްކޮށް ނޫސްވެރިކަން ކޮށް އަމިއްލަ ފައި މައްޗަށް ތެދުވެވޭނެ ގޮތެއް ހޯދުންކަމަށް ނާޒިމް ވިދާޅުވި އެވެ. ވެރިކަމަށް އަންނަ ސަރުކާރެއްގެ ފަހަތުގަ ސަރުކާރުންދޭ އެއްޗެއް ބަލައިގަނެގެން ސަރުކާރަކުން ބޭނުންވާ ގޮތަކަށް ހަބަރު ލިޔެގެން އެސަރުކާރަކުން ބޭނުންވާ ގޮތަށް ނޫސްވެރިން ކަންތައް ކުރާކަމަށް ވާނަމަ ރާއްޖޭގެ ނޫސްވެރިކަން ދުވަހަކުވެސް ކުރިއަރައިގެން ނުދާނެކަމަށް ނާޒިމް ވިދާޅުވި އެވެ.
