ރަސްމާލެ މަޝްރޫއުގެ ދަށުން މިހާތަނަށް 129 ހެކްޓަރުގެ ސަރަހައްދެއް ހިއްކުމުގެ އިތުރުން، އެ މަޝްރޫއުގެ އިތުރު މަސައްކަތްވެސް ބާރު ސްޕީޑްގައި ކުރިއަށްދާކަމަށް ސަރުކާރުން ހާމަކޮށްފި އެވެ.

ސަރުކާރުން މިކަން ހާމަކޮށްފައި މިވަނީ، މިއަދު ރަސްމާލެ މަޝްރޫއު ހިނގަމުންދާ ގޮތް ނޫސްވެރިންނަށް ދައްކާލަމުންނެވެ. އެގޮތުން މިމަޝްރޫއުގެ ދަށުން 1،009 ހެކްޓަރުގެ ސަރަހައްދެއް ހިއްކަން ހަމަޖެހިފައިވާކަމަށް ސަރުކާރުން ވަނީ ބުނެފަ އެވެ. މި 1،009 ހެކްޓަރުގެ ތެރެއިން މިވަގުތު ހިއްކިފައިވަނީ ޖުމުލަ 129 ހެކްޓަރުގެ ސަރަހައްދެކެވެ. އެއީ މަޝްރޫއުގެ 12.6 އިންސައްތަ އެވެ. ރަސްމާލެ ހިއްކާ ނިމުމުން ރާއްޖެއަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ހައްލެއް ލިބިގެންދާނެކަމަށް ސަރުކާރުން މީގެ ކުރިން ވަނީ ބުނެފަ އެވެ.

މި މަޝްރޫއުގެ ދަށުން ބޯހިޔާވަހިކަމަށް ހާއްސަކޮށްގެން، 65،000 ގޯއްޗާއި ފްލެޓް ދިނުމަށް ނިންމާފައިވާކަމަށް ސަރުކާރުން ބުނެ އެވެ.

ރަސްމާލެއަކީ ހުޅުމާލޭގެ ތިން ފިޔަވަހި ހިމެނޭ ސަރަހައްދަށްވުރެ ތިން ގުނަ ބޮޑު ސަރަހައްދެކެވެ. އަދި ހަމައެހެންމެ ރަސްމާލެ ތަރައްގީކުރުމަށް ހަމަޖެހިފައިވަނީ އީކޯ ފްރެންޑްލީ ނުވަތަ ތިމާވެއްޓާ ރައްޓެހި ސިޓީއެއްގެ ގޮތުގަ އެވެ. މި ސިޓީގެ އެންމެ ތަފާތު އެއްކަމަކީ މާލެ އަދި ހުޅުމާލެ ދެތަނުގައި ލިބެން ހުންނަ ހިދުމަތްތައް އެއްރަށަކުން އެއް ސިޓީއަކުން ލިބެން ހުރުމެވެ.

މާލެއިން ފުރައިގެން ރަސްމާލެއަށް 22 މިނެޓުން ދެވެ އެވެ. މާލެއާ ރަސްމާލެއާ ދެމެދު ފެރީގެ ނިޒާމަކުން ގުޅާލާނެކަމަށް ރައީސް ޑރ. މުއިއްޒު ވަނީ މީގެ ކުރިން ވިދާޅުވެފަ އެވެ. މީގެ އިތުރުންވެސް މާލެއާ ރަސްމާލެއާ ދެމެދު ކަނޑުއަޑީގައި ޓަނަލެއް އަޅަން ނިންމަވާފައިވާ ކަމަށް އެމަނިކުފާނު ވަނީ ވިދާޅުވެފަ އެވެ. މި ޓަނަލްގެ މަސައްކަތް ނިމުމުން ކަނޑުމަގުން މާލެއިން ރަސްމާލެއަށް ކުރަންޖެހޭ ދަތުރުތަކަށް ނިމުމެއް އަންނާނެ އެވެ.