ހުޅުމާލޭ ދެވަނަ ފިޔަވަހީގައި އެފްޑީސީގެ 4،000 ފްލެޓަށް މީހުން ދިރިއުޅުން ބަދަލުވާން ފެށުމުގެ ކުރިން، އެ ސަރަހައްދުގައި ބަސް ސްޓޮޕްތައް އިތުރުކުރުމުގެ މަސައްކަތް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ފަށައިފި އެވެ.

އެޗްޑީސީއިން ބުނީ، މި މަސައްކަތް ފަށާފައިވަނީ އެ ސަރަހައްދަށް ދިރިއުޅުން ބަދަލުކުރާ ރައްޔިތުންނަށް ފަސޭހަކަމާއެކު ދަތުރުފަތުރު ކުރެވޭނެ ނިޒާމެއް ގާއިމުކުރުމުގެ މަގުސަދުގައި ކަމަށެވެ. އެ ސަރަހައްދަކީ މީހުން ދިރިއުޅޭ މިންވަރު އިތުރުވެ، ދަތުރުފަތުރުގެ ހިދުމަތްތަކަށް ބޭނުންވާ މިންވަރު އިތުރުވާނެ ކަމަށް ބެލެވޭތީ، އެކަމަށް ތައްޔާރުވުމުގެ ގޮތުން މި މަސައްކަތް ފަށާފައިވާ ކަމަށް އެޗްޑީސީން ފާހަގަކުރެ އެވެ.

ބަސް ސްޓޮޕްތައް އިތުރުކުރުމުގެ މަސައްކަތް ފަށާފައިވާއިރު އެފްޑީސީން ދަނީ ގެދޮރުވެރިޔާ ސްކީމްގެ ދަށުން ފްލެޓް ލިބޭ ފަރާތްތަކާއެކު އެއްބަސްވުންތަކުގައި ސޮއިކުރުމުގެ މަސައްކަތް ކުރަމުންނެވެ.

ފްލެޓް ލިބުނު ފަރާތްތަކާއެކު އެއްބަސްވުމުގައި ސޮއި ކުރުމުގެ ކަންކަން އެފްޑީސީން ފަށާފައިވަނީ މިދިޔަ މަހުގެ 21 ވަނަ ދުވަހު އެވެ. މި މަސައްކަތް ކުރިއަށްދަނީ ހުޅުމާލޭ ސިންތެޓިކް ޓްރެކްގަ އެވެ. އެފްޑީސީން މައުލޫމާތުދީފައިވާ ގޮތުގައި، ގެދޮރުވެރިޔާ ސްކީމުގެ ދަށުން ފްލެޓް ލިބިފައިވާ ފަރާތްތަކުގެ މައުލޫމާތު ހައުސިން މިނިސްޓްރީން އެފްޑީސީއަށް ހިއްސާކުރަމުންދާ މިންވަރަކުން، އެ ފަރާތްތަކުގެ މައުލޫމާތު ޕޯޓަލް މެދުވެރިކޮށް އަދާހަމަކުރެވޭނެ އެވެ. އަދި އެ ފަރާތްތަކަށް އެސްއެމްއެސް މެދުވެރިކޮށް އެއްބަސްވުމުގައި ސޮއިކުރުމަށް ދެވޭ ތާރީހާއި ވަގުތުގެ މައުލޫމާތު ދެމުންދާނެ ކަމަށްވެސް އެފްޑީސީން ހާމަކުރި އެވެ.