ލާމަރުކަޒީ ގާނޫނަށް ގެނެވުނު އިސްލާހުތަކަކީ އެ ނިޒާމު ޗެމްޕިއަންކުރުމަށް ކޮންމެހެން ގެންނަންޖެހޭ އިސްލާހުތަކެއްކަމަށް މަޝްހޫރު ވިޔަފާރިވެރިޔާ އަދި މާމިގިލީ ދާއިރާގެ މަޖިލިސް މެމްބަރު ގާސިމް އިބްރާހީމް ވިދާޅުވެއްޖެ އެވެ.
ގާސިމް މި މޭރުމުން ވިދާޅުވެފައި ވަނީ އޭނާގެ އެކްސް އެކައުންޓްގައި ހިއްސާކުރެއްވި ޕޯސްޓެއްގަ އެވެ. އެ ގޮތުން ލާމަރުކަޒީ ގާނޫނަށް މިފަހުން ގެނެވުނު އިސްލާހުތަކަކީ ވަރަށް މުހިއްމު އިސްލާހުތަކެއްކަމަށް ދެކިލައްވާ ކަމަށާއި، މިއަދުގެ ހާލަތާއި ގުޅިގެން ވަރަށް ބޮޑަށް ބޭނުންޖެހިފައިވާ އިސްލާހެއްކަމަށް ގާސިމް ވަނީ ވިދާޅުވެފަ އެވެ. އަދި ހަމައެހެންމެ، ރާއްޖެއަކީ ޔުނިޓަރީ ދައުލަތެއްކަމަށް ދިވެހިރާއްޖޭގެ ގާނޫނު އަސާސީގައި ބަޔާންކޮށްފައިވާކަން ފާހަގަކުރައްވައި ގާސިމް ވިދާޅުވީ، ރާއްޖޭގެ ލާމަރުކަޒީ ގާނޫނު ވެސް އޮންނަންވާނީ ޔުނިޓަރީ ދައުލަތަކުން ކަންކަން ފުޅާކުރެވޭނެ މިންވަރަކަށް އެ ހުދޫދުގެ ތެރޭގައި ޔުނިޓަރީ ދައުލަތެއްގެ ވެރިކަން ހިންގުމުގެ ބާރުތަކާއި، ފްރޭމްވޯކާއި ފުށުއަރާގޮތަށް މިފަދަ އެއްވެސް ގާނޫނެއް ހެދިފައި އޮވެގެން ނުވާނެކަމަށެވެ.
ދިވެހިރާއްޖެ އަކީ ފެޑަރަލް ދައުލަތެއް ނޫންކަން ފާހަގަކުރައްވައި ގާސިމް ކުރެއްވި ޕޯސްޓުގައި ވިދާޅުވެފައިވަނީ، ލާމަރުކަޒީ ނިޒާމުން ރާއްޖޭގެ އިދާރީ ދާއިރާތައް ހިންގުން ގާނޫނު އަސާސީގައި ބަޔާންކޮށް އޭގެ މައްޗައް ގާނޫނެއް ވުޖޫދަށް ގެނެސް ވޭތުވެދިޔަ 14 ވަރަކަށް އަހަރު ރާއްޖެ ހިންގަމުންދާކަަމަށާއި، މި ގާނޫނާއި އެކު ބައެއް ފަރާތްތަކުން އަންނަނީ ފެޑަރަލް ވިސްނުންތައް ގެންގުޅެމުންކަމަށެވެ. ހާއްސަ ގޮތެއްގައި ސަރުކާރާއި އިދިކޮޅު ޕާޓީތަކުން އެފަދަ ވާހަކަތައް ޕްރޮމޯޓްކުރާކަން ފާހަގަކުރެވޭ ކަމަށް ގާސިމް ވިދާޅުވި އެވެ.
Advertisement
ކުރިއަށް އޮތް އިންތިހާބާ ދިމާކޮށް ސިޔާސީ ބޭނުމަށް، ރަށްރަށުގެ ބިންތައް ދޫކޮށް، ގިނަ އަދަދަކަށް މުވައްޒަފުން ނެގުމުގެ ފުރުސަތު އޮވެގެން ނުވާނެ ކަމަށާއި އެއި ނާޖާއިޒު ފައިދާއެއް ކަމަށް ގާސިމް ކުރެއްވި ޕޯސްޓުގައި ވިދާޅުވި އެވެ. އަދި ހަމައެހެންމެ، އަންނަ ދައުރަށް ހޮވުމުގެ ބޭނުމުގައި ސަރުކާރުގެ މާލިއްޔަތު ތަންނުދޭ މިންވަރަށް އިތުރު މަގާމުތައް އުފެއްދުމުގެ ބާރު ގާނޫނަކުން ކައުންސިލަރުންނަށް ލިބިދީފައި އޮވެގެން ނުވާނެކަމަށްވެސް ގާސިމް ވަނީ ވިދާޅުވެފަ އެވެ.
މިހާރު އޮތް ކައުންސިލްތަކުން އިހްލާސްތެރިވާން ޖެހޭނީ ގާނޫނު އަސާސީގައި ބުނާ ޔުނިޓަރީ ދައުލަތުގެ ވިސްނުމަށް ކަމަށާއި، މި އިސްލާހުގެ ސަބަބުން ފައިދާވާނީ ރައްޔިތުންނަށް އަދި ސަރުކާރަކަށް ނޫންކަމަށް ގާސިމް ވަނީ ވިދާޅުވެފަ އެވެ. އަދި ހަމައެހެންމެ، ރަށެއްގެ ތަރައްގީގެ ޕްލޭނަކީ ރައްޔިތުންގެ ހިޔާލާއެކު ފާސްކޮށްފައިވާ އެއްޗެއް ކަމަށް ވާއިރު، އޭގައި ނުހިމެނޭ ކަންކަން އިންތިހާބާ ދިމާކޮށް ސީޔާސީ ބޭނުމަށް، ކުއްލިއަކަށް ފެށުމުގެ އިހްތިޔާރުވެސް ކައުންސިލަރުންނަށް ލިބިދީފައި އޮވެގެން ނުވާނެކަމަށާއި މިކަމުގެ ސަބަބުން ގައުމަށް ނުހަނު ގިނަ ގެއްލުންތަކެއް ލިބެމުންދާކަމަށް ގާސިމް ވަނީ ވިދާޅުވެފަ އެވެ.
