އދ. މާމިގިލީގައި މަޝްހޫރު ވިޔަފާރިވެރިޔާ އަދި އެ ދާއިރާގެ ރައްޔިތުންގެ މަޖިލީހުގެ މެންބަރު އޮނަރަބަލް ގާސިމް އިބްރާހިމް ބިނާކުރެއްވި ފުރިހަމަ މިސްކިތް "މަސްޖިދު އިބްރާހިމް" މިއަދު ރަސްމީކޮށް ހުޅުވައިފިއެވެ.

މި މިސްކިތް ހުޅުވައިދެއްވީ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި އޮނަރަބަލް ގާސިމް އިބްރާހިމް އެވެ. މިކަމަށްޓަކައި މިއަދު މާމިގިލީގައި ބޭއްވުނު ހާއްސަ ރަސްމިއްޔާތުގައި ގާސިމް އިބްރާހިމްގެ އިތުރުން މާމިގިލީ ކައުންސިލްގެ އިސްވެރިންނާއި ރަށުގެ ގިނަ އަދަދެއްގެ ރައްޔިތުން ބައިވެރިވި އެވެ.

_{މާމިގިލީގައި އަލަށް ހުޅުވުނު މިސްކިތުގައި މިއަދު ހުކުރު ނަމާދުކުރަނީ. / ފޮޓޯ: ޚުލާސާ}

މިސްކިތް ހުޅުވައިދެއްވުމަށްފަހު، އެ މިސްކިތުގައި ކުރެވުނު ފުރަތަމަ ހުކުރު ނަމާދު އިމާމުވެ ކުރެއްވީ މިނިސްޓަރު ޝަހީމް އެވެ.

މަސްޖިދު އިބްރާހިމަކީ އެއްފަހަރާ 800 މީހުންނަށް ނަމާދު ކުރެވޭނެ ޖާގަ އޮތް މިސްކިތެކެވެ. މި މިސްކިތުގައި އަންހެނުންނާއި ފިރިހެނުންނަށް ވަކިން ނަމާދު ކުރެވޭނެ އިންތިޒާމާއި، ވުޟޫ ކުރެވޭނެ ފަސޭހަ އިންތިޒާމްތައް ވަނީ ގާއިމްކޮށްފައެވެ. މީގެ އިތުރުން، މުޅި މިސްކިތް ވަނީ އޭސީ ކޮށްފަ އެވެ.

މި ރަމަޟާން މަހާ ދިމާކޮށް ސަރުކާރުގެ ހަރަދުގައާއި އަމިއްލަ އެކި ފަރާތްތަކުގެ އެހީތެރިކަމާއެކު ރާއްޖޭގެ އެކި ސަރަހައްދުތަކުގައި ޖުމްލަ 15 މިސްކިތެއް ހުޅުވާފައިވާކަން ފާހަގަކޮށްލެވެ އެވެ. ރަމަޟާން މަސް ނިމޭއިރު ރާއްޖޭގެ އެކިކަންކޮޅުތަކުގައި މުޅި ޖުމްލަ 20 މިސްކިތް ހުޅުވިގެންދާނެކަމަށް މިނިސްޓްރީން މައުލޫމާތުދެ އެވެ.