ސަބްސިޑީގެ ބަޖެޓު 99 އިންސައްތަ ހުސްވެފައިވާން ފިނޭންސް މިނިސްޓްރީގެ ތަފާސްހިސާބުތަކުން ދައްކައިފި އެވެ.
ފިނޭންސް މިނިސްޓްރީ އިން މި އަހަރުގެ މި މަހުގެ ހަތް ވަނަ ދުވަހާ ހަމައަށް ހިނގި ހަރަދާއި އާމްދަނީގެ ތަފާސްހިސާބުތަށް އާންމުކޮށްފައި ވާއިރު، މި މަހުގެ ބާކީ ދުވަސްތަކާ އެކު އަހަރުގައި ބާކީ އޮތް ފަސް މަސް ދުވަސް އޮއްވައި އާސްންދަ އާއި ސަބްސިޑީ އަށް ބަޖެޓުކުރި އަދަދުގެ ބޮޑުބައެއް ވަނީ ހުސްވެފަ އެވެ.
މި އަހަރުގެ އާސަންދަ އަށް ބަޖެޓު ކޮށްފައިވަނީ 1،859.6 މިލިއަން ރުފިޔާ އެވެ. މި މަހުގެ ހަތް ވަނަ ދުވަހާ ހަމައަށް 1،169.8 މިލިއަން ރުފިޔާ ވަނީ ހަރަދު ކޮށްފައި އެވެ.
ސަބްސިޑީއަށް މިހާތަނަށް ހަރަދު ކޮށްފައިވަނީ 1836.4 މިލިއަން ރުފިޔާ އެވެ. ސަބްސިޑީގެ ބަޖެޓަށް މި އަހަރު ހަމަ ޖައްސާފައިވަނީ 1،859.6 މިލިއަން ރުފިޔާ އެވެ. އެ ގޮތުން ސަބްސިޑީގެ 99 ޕަސެންޓު މިވަނީ ހުސްވެފައި އެވެ.
މިދިޔަ އަހަރުގެ މިހާތަނަށް ސަބްސިޑީއަށް 2،496 މިލިއަން ރުފިޔާ ހަރަދުކުރި އެވެ. މި އަހަރުގެ މިހާތަނަށް ސަރުކާރުން ޖުމުލަ ހަރަދުކޮށްފައިވަނީ 22.3 ހާސް މިލިއަން ރުފިޔާ އެވެ. އެއީ، ލިބުނު އާމްދަނީއަށްވުރެ ކުޑަ ހަރަދެކެވެ. އެގޮތުން، އަހަރުގެ މިހާތަނަށް އާމްދަނީގެ ގޮތުގައި 23.7 ހާސް މިލިއަން ރުފިޔާ ވަނީ ލިބިފަ އެވެ.
