އަޅުގަނޑުގެ އެއްވެސް ދަރިއަކު މެލޭޝިޔާގައި ހުންނަ ރާއްޖޭގެ އެމްބަސީގެ ވަޒީފާއެއްގަ ނުހުންނާނެކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

ޑރ ޝަހީމް މި މޭރުމުން ވިދާޅުވެފައި ވަނީ ރާއްޖޭގެ ބައެއް އޮންލައިން ނޫސްތަކުން ހަގީގަތް އޮޅޭ ފަދަ ގޮތަކަށް، ޑރ. ޝަހީމްގެ ދަރިކަލުން މެލޭޝިޔާގައި ހުންނަ ރާއްޖޭގެ އެމްބަސީގައި ވަޒީފާ އަދާކުރާކަމަށް ބުނެ ދޮގު ހަބަރު ފަތުރަމުންދާތީ އެކަމަށް ރައްދު ދެއްވަމުން މިއަދު ފޭސްބުކްގައި ހިއްސާކުރެއްވި ސްޓޭޓަސްއެއްގަ އެވެ.

"ރާއްޖޭގެ ބައެއް ނޫސްތަކުގައި ލިޔާ މީހުން ތިބެނީ ކިހިނެއް ވެފަ ބާއޭ ހިތަށް އަރާ. ތަކުރާރުކޮށް ބުނަމުން މި ދަނީ އަހަރެންގެ ދަރިޔަކު މެލޭޝިޔާގައި ހުންނަ ރާާއްޖޭގެ އެމްބަސީގެ ވަޒީފާއެއްގައި އެއް ނުހުންނާނޭ. ނުހުންނާނޭ. ނުހުންނާނޭ".

ޑރ. ޝަހީމް ފޭސްބުކްގައި ހިއްސާކުރެއްވި ސްޓޭޓަސްގައި ވިދާޅުވި އެވެ.

ޑރ. ޝަހީމް، ދަރިކަލުންގެ ދިފާއުގައި އިތުރަށް ވިދާޅުވެފައި ވަނީ ގައިގަ ބަނދެގެން ވޭޕް ސާމާނު އެތެރެ ކުރިކަމަށް ބުނެ ހަގީގަތާ ހިލާފަށް ވާހަކަތައް ފެތުރުމަކީ ވަރަށް ދެރަ ކަމެއް ކަމަށެވެ.

ފާހަގަކޮށްލަންޖެހޭ ގޮތުގައި ރާއްޖޭގެ ބައެއް އޮންލައިން ނޫސްތަކުގެ ހެޑްލައިންގައި ޑރ. ޝަހީމްގެ ދަރިކަލުން އަބްދުﷲ މާހިލް ޝަހީމް ރާއްޖެއަށް އައިއިރު، ވޭޕް ކުރާ ސާމާނުތަކެއް ރާއްޖެއަށް އެތެރެކުރަން އުޅުމުން ކަސްޓަމްސްއިން ހިފަހައްޓައިފި ކަމަށް ދަނީ މައުލޫމާތު ފަތުރަމުންނެވެ.

މިކަމާއި ގުޅިގެން "ޚުލާސާ" އިން ކަސްޓަމްސްގެ މީޑިއާ އޮފިޝަލަށް ގުޅުމުން ކަސްޓަމްސްގެ މީޑިއާ އޮފިޝަލުން ބުނެފައި ވަނީ ރޭގެ ވަގުތެއްގައި އެއާ އޭޝިއާގެ ފްލައިޓެއްގައި އައި ދެ މީހެއްގެ އަތުން ވޭޕް ފެނިފައިވާތީ، ދުންފަތް ކޮންޓްރޯލް ކުރުމާއި ބެހޭ ގާނޫނުގެ ދަށުން އެ ދެ މީހުން ޖޫރިމަނާކުރެވިފައިވާ ކަމަށެވެ. އަދި އޭގެ ތެރެއިން އެކަކު އަތުން 118 ވޭޕް އަދި އަނެކަކު އަތުން 107 ވޭޕް ފެނިފައިވާކަމަށް ކަސްޓަމްސްގެ މީޑިޔާ އޮފިޝަލުން ވަނީ ބުނެފަ އެވެ. އެހެން ނަމަވެސް މި މައްސަލައާއި ގުޅިގެން ހައްޔަރު ކޮށްފައި ވަނީ ކޮން ދެ މީހުންނެއް ކަމެއް ކަސްޓަމްސްއަކުން ބުނެފައެއް ނުވެ އެވެ.

މި މައްސަލަ ތަހުގީގު ކުރަމުން އަންނަ ކަމަށް ކަސްޓަމްސް އިން ވަނީ ބުނެފަ އެވެ.