ރ. ފުއްގިރި ކުއްޔަށް ދޫކުރި މައްސަލައިގައި ކުރީގެ ރައީސް އަބްދުﷲ ޔާމީން އަބްދުލް ގައްޔޫމްގެ ދިފާއުގައި ހެކިބަސް ނުދެއްވީ ރައީސް ޑރ. މުހައްމަދު މުއިއްޒު އާ ހެދިކަމަށް ޔާމީން އަރިހުގައި އެއްވެސް އިރެެއްގައި ނުދައްނަވާ ކަމަށް ޔޫތް މިނިސްޓަރުގެ އެޑްވައިޒަރު އަހުމަދު ނަރީޝް ވިދާޅުވެއްޖެ އެވެ.

ރައީސް ޔާމީން ވެރިކަމުގައި ރ. ފުއްގިރި ކުއްޔަށް ދޫކުރުމުގެ މުއާމަލާތާ ގުޅިގެން ރިޝްވަތުގެ ގަބޫލު ކުރައްވައި، އެ ފައިސާ ލޯންޑާ ކުރެއްވި ކަމަށް ބުނާ މައްސަލައިގައި ދިފާއީ ހެކިންގެ ގޮތުގައި ތިއްބެވީ ނަރީޝްއާއި ފިއުލް ސަޕްލައި މޯލްޑިވްސް (އެފްއެސްއެމް) ގެ ޑެޕިޔުޓީ މެނޭޖިން ޑިރެކްޓަރު ޝުއާއުﷲ ސައީދު އެވެ. ޔާމީންގެ ފަރާތުން މި ދެ ހެކި ހުށަހެޅުއްވީ އެމަނިކުފާނުގެ އެކައުންޓަށް ޖަމާވި އެއް މިލިއަން ޑޮލަރަށްވާ ދިވެހި ފައިސާ މާރުކުރިކަން ސާބިތުކުރެއްވުމަށެވެ. ނަމަވެސް ހެކިބަސް ނެގުމަށް ކޯޓުން ތާވަލުކުރި ދުވަހު އެ ދެބޭފުޅުންވެސް ވަނީ އެ މައްސަލައިގައި ހެކިބަސްދިނުމަށް އިންކާރުކޮށްފަ އެވެ.

ނަރީޝް މިފަދައިން ވިދާޅުވީ "އަދަދު" ނޫހުގެ ޕްރޮގްރާމަކަށް ކުރީގެ ރައީސް ޔާމީން ދެއްވި އިންޓަވިއުއާ ގުޅިގެންނެވެ. އެ އިންޓަވިއުގައި ޔާމީން ވަނީ ރ. ފުއްގިރި ކުއްޔަށް ދޫކުރި މައްސަލައިގައި ހެކިބަސް ނަގަން ތާވަލުކުރި ޝަރީއަތުގެ މަޖިލީހުގެ ކުރިން ނަރީޝް އާއި ފިއުލް ސަޕްލައި މޯލްޑީވްސްގެ ޑެޕިއުޓީ މެނޭޖިން ޑިރެކްޓަރަކަށް ހުންނެވި ޝުއާއުﷲ އަށް އެ މަނިކުފާނު ގުޅުއްވި ކަމަށް ވިދާޅުވެފަ އެވެ. އަދި ރައީސް މުއިއްޒު އެ ދެބޭފުޅުންނަށް ގުޅުއްވާފައި ހެކިބަސް ދޭން ނުދާށޭ ވިދާޅުނުވާހާ ހިނދަކު ހެކިބަސް ދޭން ކޯޓަށް ދާނެ ކަމަށް ދެބޭފުޅުންވެސް ވިދާޅުވި ކަމަށް ޔާމީންގެ އިންޓަވިއުގައި ވިދާޅުވި އެވެ.

ޔާމީން ވިދާޅުވީ އެމަނިކުފާނު މައްޗަށް ކޮށްފައިވާ ދައުވާތަކަކީ ސިޔާސީ ދައުވާތަކެކެވެ. ނަމަވެސް އެ ދައުވާތަށް މި ސަރުކާރުން އަނބުރާ ނުގެންދަނީ އެ މަނިކުފާނު ޖަލުގައި ބޭއްވުމަށް އެދޭތީ ކަމަށާއި އެމަނިކުފާނާ އެއްކޮޅަށް ހެކިބަސް ދޭން ދިޔުމުގެ ހުއްދަ ނަރީޝްއަށް ނޯންނަނީ އެ ސަބަބާ ހެދި ކަމަށް ޔާމީން ތުހުމަތު ކުރެއްވި އެވެ.

ނަމަވެސް ނަރީޝްވަނީ އެކަން ދޮގުކޮށްފަ އެވެ. ނަރީޝް ވިދާޅުވިގޮތުގައި ޔާމީން ހެެއްދެވީ އިތުރުފުޅެކެވެ. އަދި އެއްވެސް އިރެއްގައި ފުއްގިރި މައްސަލައިގައި ހެކިބަސް ނުދެއްވީ ރައީސް ޑރ. މުހައްމަދު މުއިއްޒު އާ ހެދިކަމަށް ރައީސް ޔާމީން އަރިހުން ދަންނަވާފައިނުވާނެ ކަމަށް އޭނާ ވިދާޅުވި އެވެ.

ނަރީޝް އާއި ޝުއާއުالله އަކީ ވެސް ކުރީ ސަރުކާރުގެ ދުވަސްވަރު ޔާމީންގެ ދިފާއުގައި އެންމެ ގަދައަށް ވާހަކަދެއްކެވި ދެ ބޭފުޅުންނެވެ. އަދި ނަރީޝްއަކީ އާރަށް މައްސަލައިގައި ޔާމީންގެ ދިފާއުގައި ހެކި ދިން އެކަކެވެ. އެ މައްސަލައިގައި އޭނާ ދޮގުހެކި ބަސް ދިން ކަމަށް ތުހުމަތުކޮށް އޭރު އެ މައްސަލަ ވެސް ބެލި އެވެ.

ފުއްގިރި މައްސަލައިގައި ޔާމީންގެ މައްޗަށް ވަނީ ރިޝްވަތު ގަބޫލުކުރުމާއި މަނީ ލޯންޑްރިންގެ ދައުވާ އުފުލާފައެވެ. މިމައްސަލައިގައި ރައީސް ޔާމީންގެ އިތުރުން ދައުވާ ކޮށްފައިވަނީ އަހުމަދު ކްރިކް ރިޟާގެ މައްޗަށާއި، ސަން ކޮންސްޓްރަކްޝަން އެންޑް އިންޖިނިއަރިން ޕްރައިވެޓް ލިމިޓެޑާއި ސަން އިންވެސްޓްމަންޓް ޕްރައިވެޓް ލިމިޓެޑްގެ އިތުރުން މއ. ކުރިކީލަހިޔާ އަހުމަދު ކްރިކް ރިޒާގެ މައްޗަށް ރިޝްވަތު ދިނުމުގައި މެދުވެރިއަކަށް ވުމުގެ ދައުވާ ކުރެއެވެ.