މި އަަހަރުގެ މިއަދާ ހަމަ އަށް ރާއްޖެ އައި ޗައިނާ ފަތުރުވެރިންގެ އަދަދު ދެ ލައްކަ އަށް އަރައިފި އެވެ.
ޓޫރިޒަމް މިނިސްޓްރީގެ ތަފާސް ހިސާބު ތަކުން ދައްކާގޮތުގައި ޗައިނާ އިން ރާއްޖެ އަށް މިހާތަނަށް އައި ފަތުރުވެރިންގެ އަދަދަކީ 15 ޕަސެންޓެވެ. މިއަހަރުގެ މިހާތަނަށް ރާއްޖެއަށް 1.3 މިލިއަން ފަތުރުވެރިން އައިސްފައި ވާއިރު، އެންމެ ގިނަ ފަތުރުވެރިން އައިސްފައިވަނީ ޗައިނާ އިންނެވެ.
ދެވަނަ އަށް އެންމެ ގިނަ ފަތުރުވެރިން އައިސްފައިވަނީ ރަޝިއާ އިން ކަމަށް އެ ހިސާބު ތަކުން ދައްކަ އެވެ. ރަޝިއާއިން ވަނީ 160،000 ފަތުރުވެރިން އައިސްފަ އެވެ. އެއީ ޖުމްލަ 12 ޕަސެންޓެވެ.
މި އަހަރުގެ ފަތުރުވެރިން އައި އަދަދު ވަނީ މިދިޔަ އަހަރާ ބަލާއިރު ނުވަ ޕަސެންޓު އިތުރު ވެފައި އެވެ. މިދިޔަ އަހަރުގެ މި މުއްދަތުގައި ރާއްޖެ އައިސްފައިވަނީ 1.2 މިލިއަން ފަތުރުވެރިންނެވެ.
މީ ދިވެހި ރާއްޖެއަށް އާންމުކޮށް އެންމެ މަދުން ފަތުރުވެރިން އަންނަ ދުވަސްވަރެވެ. ފަތުރުވެރިން އަނެއްކާވެސް އަންނަން ފަށާނީ އޮކްޓޫބަރު މަހުގެ ފަހުކޮޅުން ފެށިގެންނެވެ. އެއަށްފަހު އަނެއްކާވެސް ފަތުރުވެރިކަމުގެ ސީޒަން ފެށޭނެ އެވެ.
