ރާއްޖޭގެ ޒުވާނުންގެ ޤައުމީ ސިޔާސަތު އެކުލަވާލުމުގެ މަސައްކަތް ރަސްމީކޮށް ފަށައިފި އެވެ. މި މަސައްކަތުގެ ދަށުން، ސިޔާސަތަށް ބޭނުންވާ މައިގަނޑު ފްރޭމްވަރކް އެކުލަވާލުމުގެ މަސްއޫލިއްޔަތު ދިވެހި ޒުވާނުންގެ ޤައުމީ ލަފާދޭ ކޮމިޓީން ވަނީ ދިވެހިރާއްޖޭގެ އިސްލާމީ ޔުނިވަސިޓީ (އައިޔޫއެމް) އާ ހަވާލުކޮށްފަ އެވެ.
ޒުވާނުންގެ ސިޔާސަތު އެކުލަވާލުމަށް ބޭނުންވާ ފްރޭމްވަރކް ހެދުމުގެ މަސައްކަތް އިސްލާމީ ޔުނިވަސިޓީއާ ހަވާލުކުރުމުގެ އެއްބަސްވުމެއް ވަނީ އެކުލަވާލާފަ އެވެ. މި އެއްބަސްވުމުގައި ދިވެހި ޒުވާނުންގެ ގައުމީ ލަފާދޭ ކޮމިޓީގެ ފަރާތުން ސޮއިކުރެއްވީ ކޮމިޓީގެ ނައިބު ރައީސް ފާތިމަތު ނަޒާހާ ނަޒީމެވެ. އިސްލާމީ ޔުނިވަސިޓީގެ ފަރާތުން ސޮއިކުރެއްވީ ސެންޓާ ފޯ ރިސާޗް އެންޑް ޕަބްލިކޭޝަންގެ ޑީން ޑރ. އައިމިނަތު ޝާފިޔާ އާދަމެވެ.
އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން ޒުވާނުން ބާރުވެރިކުރުވުމާއި މައުލޫމާތާއި ފަންނާބެހޭ ވަޒީރުގެ ހާއްސަ އެޑްވައިޒަރު އަހުމަދު ނަރީޝް ވިދާޅުވީ، ހުނަރުވެރި އެތައް ޒުވާނަކަށް ވަޒީފާ ނުލިބި، ރާއްޖޭގެ އެކި ކަންކޮޅުތަކުގައި އެބަތިބި ކަމަށެވެ. އަދި ތަޢުލީމީ، ގާބިލު ޒުވާނުން ތިބި ދާއިރާތަކަކީ ކޮބައިކަން ދެނެގަނެ، އެ ފަރާތްތަކަށް ފުރުސަތުތައް ހޯދައިދޭންޖެހޭކަމަށް ނަރީޝް ފާހަގަކުރެއްވި އެވެ. ޒުވާނުންގެ ގައުމީ ސިޔާސަތު އެކުލަވާލާއިރު، އެ ކަންކަމަށް ސަމާލުކަން ދިނުން މުހިންމުކަމަށްވެސް ނަރީޝް ވިދާޅުވި އެވެ. "ހުނަރުވެރި ގިނަ ޒުވާނުން އެބަ ތިބި. ގާބިލު ގިނަ މަސައްކަތްތަކެއްކުރާ ޒުވާނުން އެބަތިބި. އެ މީހުން ތިބީ ސެޓްފިކެޓެއް ނެތުމުން ވަޒީފާ ނުލިބިފައި. އެކަމަކު އެ ކުދިންވެސް ސެޓިފައިކުރެވޭނެ ގޮތެއް ހޯދަން އެބަޖެހޭ،" ނަރީޝް ވިދާޅުވި އެވެ.
Advertisement
ޒުވާނުންގެ ސިޔާސަތާ ގުޅޭގޮތުން ވާހަކަދައްކަވަމުން ދިވެހި ޒުވާނުންގެ ގައުމީ ލަފާދޭ ކޮމިޓީގެ މެންބަރު ހުސައިން އަރުބާން ފަވާޒު ވިދާޅުވީ، އިސްލާމީ ޔުނިވަސިޓީން ފްރޭމްވޯކް އެކުލަވާލާއިރު، ޒުވާނުންނާ ގުޅޭގޮތުން މީގެކުރިން ހަދާފައިވާ ދިރާސާތަކަށް އަލިއަޅުވާލާނެ ކަމަށެވެ. އެ ގޮތުން ކުރީގެ ދިރާސާތަކުގައި ޒުވާނުންނަށް ދިމާވާ މައްސަލަތަކާއި އެ މައްސަލަތައް ހައްލުކުރުމަށް ދީފައިހުރި އިރުޝާދުތައް އެއް ކަރުދާސް ކުރެވޭނެކަމަށް އަރުބާން ވިދާޅުވި އެވެ.
"ޒުވާނުންގެ ގައުމީ މަހާސިންތާއެއް ބޭއްވޭނެ. މި މަހާސިންތާގައި އެކަށައެޅޭނެ ޒުވާނުންގެ ގައުމީ ނެޓްވޯކް. އަދި މި މަހާސިންތާގެ ތެރެއިން ހުރިހާ ދާއިރާތަކުން ޒުވާނުންނަށް ދިމާވާ މައްސަލަތަކާއި ޝަކުވާތައް ހުށައެޅުމަށް ފުރުސަތު ދެވޭނެ،" އަރުބާން އިތުރަށް ވިދާޅުވި އެވެ.
ޒުވާނުންގެ ކަންކަމުގައި ރައީސުލްޖުމްހޫރިއްޔާއަށް ލަފާއެރުވުމަށް ދިވެހި ޒުވާނުންގެ ގައުމީ ލަފާދޭ ކޮމިޓީ އެކުލަވާލާފައިވަނީ މިދިޔަ އަހަރުގެ އޮގަސްޓް މަހުގެ 12 ވަނަ ދުވަހު އެވެ. މި ކޮމިޓީ އުފެއްދުމުގެ މައިގަނޑު މަގުސަދުތަކަކީ ގައުމީ ކަންކަމުގައި ޒުވާނުންގެ ބައިވެރިވުން އިތުރުކުރުމާއި، މަޝްވަރާއާއި ނިންމުންތައް ނިންމާއިރު ޒުވާނުން ދެކޭގޮތް ހާމަކުރެވޭނެ ގޮތް ފަހިކުރުމެވެ. މީގެ އިތުރުން ޒުވާނުންނަށް ދިމާވާ އެކިއެކި މައްސަލަތައް ހައްލުކުރުމަށް މަސައްކަތްކުރުންވެސް ހިމެނެ އެވެ. މި މަސައްކަތުގެ ތެރެއިން އެންމެ މުހިންމު އެއް މަސައްކަތަކީ ދިވެހި ޒުވާނުންގެ ގައުމީ ސިޔާސަތެއް އެކުލަވާލުމެވެ.
