ކޭޝްލެސް މުއާމަލާތްތަކަށް ނެޝަނަލް ކިއުއާރް ކޯޑެއް ތައާރަފުކުރުމުގެ މަސައްކަތް ކުރަމުންދާ ކަމަށް މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފި އެވެ.
އެމްއެމްއޭ އިން ބުނީ ކިއުއާރު ކޯޑު ޑިވެލޮޕްކުރުމުގެ މަސައްކަތް މިހާރު ފަށާފައިވާ ކަމަށެވެ. އަދި މި ކިއުއާރު ކޯޑު ތައާރަފްކުރުމުން ފައިސާގެ މުއާމަލާތްތަށް ހިންގުމުގައި އިތުރު ފަސޭހަތަކެއް ލިބި ރައްކާތެރިގޮތެއްގައި ކުރެވޭނެ ކަމަށާއި މި ހިދުމަތް އަންނަ އަހަރު ތައާރަފުކުރެވޭނެ ކަމަށް ބުންޏެވެ.
އެމްއެމްއޭއިން ޑިވެލޮޕްކުރާ ކިއުއާރު ކޯޑު މަސައްކަތް ކުރާނީ އިންޑިއާގެ ނޭޝަނަލް ކިއުއާރު ކޯޑް ސިސްޓަމެއް ކަމަށްވާ "ބާރަތު ކިއުއާރު" ކޯޑާ އެއްގޮތަށެވެ. އެއީ ނޭޝަނަލް ޕޭމަންޓްސް ކޯޕަރޭޝަން އޮފް އިންޑިއާ (އެންޕީސީއައި) އިން މާސްޓާކާޑް އަދި ވިސާއާ ގުޅިގެން އުފައްދާފައިވާ ކިއުއާރު ކޯޑެކެވެ.
Advertisement
އެމްއެމްއޭއިން ބުނި ގޮތުގައި މި ކޯޑުގެ ހިދުމަތް ފޯރުކޮށްދޭނީ ގައުމީ ޕޭމަންޓް ސިސްޓަމް، "ފަވަރަ" މެދުވެރިކޮށް ކަމަށެވެ. އަދި ފަވަރަ އާއި އިންޑިއާގެ ޔޫޕީއައި އިންޓަގްރޭޓް ކުރުމުގެ މަސައްކަތްވެސް ކުރަމުން އަންނަ ކަމަށާއި އެ މަސައްކަތް ނިމުނުން ބައިނަލްއަގުވާމީ ޓްރާންސްފާތައްވެސް ކުރެވޭނެ ކަމަށް މަރުކަޒީ ބޭންކުން ބުންޏެވެ.
ކިއު އާރު ކޯޑް ޕޭމަންޓް ސިސްޓަމަކީ ދުނިޔޭގައި ގިނަ ގައުމުތަކެއްގައި މިހާރު ބޭނުންކުރަމުން އަންނަ ޕޭމަންޓް ނިޒާމެކެވެ. އޭގެ ސަބަބުން ކަސްޓަމަރުން ސްމާޓްފޯނުން ކިއުއާރު ކޯޑު ސްކޭންކޮށް ފައިސާ ދެއްކޭއިރު ވެންޑާސް ތަކުގެ އަތުން ކާޑު ޓްރާންސެކްޝަންތަކަށް ނަގާ ފީ މި ހިދުމަތުން ނުނަގާނެ އެވެ.
