ގެވެށި އަނިޔާގެ މައްސަލައެއްގައި ފްލެޓެއް ބަލައި ފާސްކުރި އިރު ވޭޕް ފްލޭވާ ފުޅިތަކެއް ފެނިއްޖެއެވެ.
ފުލުހުން މިއަދު މީޑިއާތަކަށް ފޮނުވި މެސެޖެއްގައި ބުނީ ރޭ 21:14 ހާއިރު ހުޅުމާލޭ ފޭސް ދެއެއްގެ ފުލުހަށް ހުށަހެޅި މައްސަލައަކާ ގުޅިގެން ހިޔާ ފްލެޓެއްގެ އެޕާޓްމަންޓެއް ބަލައިފާސްކޮށްފައިވާ ކަމަށެވެ.
އެ އެޕާޓްމަންޓް ބަލައިފާސްކުރި އިރު ގިނަ އަދަދެއްގެ ވޭޕް ފްލޭވާ ފުޅިތަކެއް ފެނިފައިވާ ކަމަށް ފުލުހުން ބުނެފައިވެއެވެ.
ފުލުހުން ބުނީ މި މައްސަލައިގައި ޖުމްލަ 242 ވޭޕް ފްލޭވާ ފުޅި ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ. އަދި މި މައްސަލަ ތަހުގީގުކުރަމުން އަންނަ ކަމަށްވެސް ފުލުހުން ބުނެފައިވެއެވެ.
ވޭޕްގެ އެކި ބާވަތްތައް ރާއްޖެ އެތެރެކުރުމާއި ރާއްޖޭގައި ބޭނުން ކުރުމާއި ހިލޭ ބެހުމާއި ވިއްކުމަކީ މަނާކަމެކެވެ. އެފަދައިން މަނާކުރުމަށް ރައީސް ޑރ. މުހައްމަދު މުއިއްޒު ނިންމެވީ މިދިޔަ އަހަރުގެ އޮކްޓޯބަރު މަހުގެ 14 ވަނަ ދުވަހުއެވެ.
ފުލުހުންގެ ތަފާސްހިސާބުތައް ދައްކާގޮތުން މިދިޔަ ޖުލައި މަހު އެކަނިވެސް ވޭޕާއި ގުޅޭ އެކި މައްސަލަތަކުގައި 22 މީހަކު ވަނީ ޖޫރިމަނާކޮށްފައެވެ. އަދި މިދިޔަ މަހު އެކަކުން ފެށިގެން 31 ގެ ނިޔަލަށް ވޭޕް ބޭނުންކޮށްގެން ޖުމްލަ 13 މީހަކު 62،000 ރުފިޔާއިން ޖޫރިމަނާކޮށްފައިވާއިރު، ވޭޕް ގެންގުޅެގެން ނުވަ މީހަކު 58،000 ރުފިޔާއިން ވަނީ ޖޫރިމަނާކޮށްފައެވެ.
