މި އަހަރުގެ މިހާތަނަށް ސޮވްރިން ޑިވެލޮޕްމަންޓް ފަންޑަށް އެއް ބިލިއަނަށް ވުރެ ގިނަ ރުފިޔާ ޖަމާކޮށްފައިވާ ކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފި އެވެ.
ސޮވްރިން ފަންޑަށް މިއަހަރު ޖަމާކުރެވޭނެ ކަމަށް ބަޖެޓުގައި ލަފާކޮށްފައިވަނީ 2.1 ބިލިއަން ރުފިޔާ އެވެ. ފިނޭންސް އިން އާއްމުކޮށްފައިވާ ވީކްލީ ފިސްކަލް ޑިވެލޮޕްމަންޓް ރިޕޯޓުގައިވާ ގޮތުން މިދިޔަ ޖުލައި މަހުގެ ނިޔަލަށް ސޮވްރިން ފަންޑަށް 1.18 ބިލިއަން ރުފިޔާ ވަނީ ޖަމާކޮށްފަ އެވެ. އެއީ މިދިޔަ އަހަރުގެ އެ މުއްދަތާއި އަޅައިބަލާއިރު 405 މިލިން ރުފިޔާއަށް ވުރެ އިތުރު އަދަދެކެވެ. މިދިޔަ އަހަރު ޖުލައިގެ ނިޔަލަށް އެ ފަންޑަށް ޖަމާކޮށްފައިވަނީ 783 މިލިއަން ރުފިޔާ އެވެ.
ރިޕޯޓުގައި ފާހަގަކޮށްފައިވާ ގޮތުގައި ލޯނުތައް އަދާކުރުމަށް ޖުލައިގެ ނިޔަލަށް 3.5 ބިލިއަން ރުފިޔާ ވަނީ ހޭދަކޮށްފަ އެވެ. އެއީ މިދިޔަ އަހަރުގެ އެމުއްދަތާ އަޅައިބަލާއިރު 1.9 ބިލިއަން ރުފިޔާ އިތުރު އަދަދެކެވެ.
ސޮވެރިން ފަންޑަކީ ގައުމުގެ އިގުތިސާދަށް ކުރިމަތިވެދާނެ ކުއްލި ހާލަތަކަށާއި ތަރައްގީގެ އެކި މަޝްރޫއުތައް ހިންގަން ނަގާ ބޮޑެތި ލޯނުތައް އަނބުރާ އަދާކުރަން ދުރާލައި ތައްޔާރުވުމަށް 2017 ވަނަ އަހަރު ސަރުކާރުން އުފައްދާފައިވަ ހާއްސަ ފަންޑެކެވެ.
އެ ފަންޑަށް ފައިސާ ޖަމާކުރަނީ އެއާޕޯޓް ޑިވެލޮޕްމެންޓް ފީ އާއި ވެލާނާ އިންޓަނޭޝަނަލް އެއާޕޯޓް (ވީއައިއޭ) އިން ދޭ ހިދުމަތްތަކުގެ އަގަށް ބަދަލު ގެނެސްގެން އިތުރުވާ ފައިސާ އިންނެވެ.
