ފިއުލް ސަޕްލައި މޯލްޑިވްސް (އެފްއެސްއެމް) އިން މޯލްޑިވްސް ޕޯޓްސް ލިމިޓެޑް (އެމްޕީއެލް) އަށް ވިއްކި ތެލުގެ މުއާމަލާތުގެ ތެެރެއިން، އެފްއެސްއެމްގެ މުވައްޒަފުން ހިންގި ކޮރަޕްޝަންގައި އެމްޕީއެލްއަށް ގެއްލުނު ތެލުގެ ބަދަލު، އެކަމުގައި ހިޔާނާތްތެރިވި ފަރާތްތަކުގެ އަތުން ހޯދަން ޕްރޮސިކިއުޓާ ޖެެނެރަލް (ޕީޖީ) އާއި ކޯޓުތަަކަށް އަންގަން ރައްޔިތުންގެ މަޖިލީހުގެ މާލިއްޔަތު ކޮމިޓީން މިއަދު ފާސްކޮށްފި އެވެ.
އެމްޕީއެލްގެ ތެޔޮގެ ހިޔާނާތުގައި ހިމެނޭ ފަރާތްތަކުގެ އަތުން ބަދަލު ހޯދަން ހުށަހަޅުއްވާފައިވަނީ ފުނަދޫ ދާއިރާގެ މެމްބަރު މުހައްމަދު މަމްދޫހު އެވެ. މި ހުށަހެޅުއްވުން ފާސްކޮށްފައިވަނީ ކޮމިޓީގެ މެމްބަރުންގެ އިއްތިފާގުންނެވެ.
މިއަދު ބޭއްވުނު މާލިއްޔަތު ކޮމިޓީގެ ބައްދަލުވުމުގައި ވާހަކަދައްކަވަމުން ހުޅުމާލޭ ދެކުނު ދާއިރާގެ މެމްބަރު ޑރ. އަހުމަދު ޝަމްހީދު ވިދާޅުވެފައިވާ ގޮތުގައި މިކަން ހިނގާތާ މިހާރު 15 ވަރަކަށް އަހަރު ވެދާނެކަމަށާއި އެންމެ ދެ އަހަރު ދުވަހުގެ ރިޕޯޓަކުން ހަގީގީ މަންޒަރު ނުފެންނާނެކަމަށެވެ.
އެމްޕީއެލްގެ އޮޕަރޭޝަންތަކަަށް ބޭނުންވާ ތެޔޮ ގަތުމުގެ މުއާމަލާތްތަކުގެ ތެެރެއިން އެފްއެސްއެމްގެ މުވައްޒަފުންތަކެއް 28.31 މިލިއަން ރުފިޔާގެ ތެލުގެ ބޮޑު ހިޔާނާތެެއް ހިންގާފައިވާކަން އޮޑިޓް ރިޕޯޓުން ހާމަވެ އެވެ. އެމްޕީއެލްގެ ތެލުގެ ހިޔާނާތުގެ މައްސަލަ އެންމެ ފުރުތަމަ ފެންމަތިވެފައި ވަނީ 2020 ވަނަ އަހަރުގެ ކޮވިޑު-19 ގެ ލޮކްޑައުންގެ ތެރޭގަ އެވެ.
މި މައްސަލައާއި ގުޅިގެން ތިން މީހަކަށް ދައުވާކުރަން ވަނީ ފޮނުވައިފަ އެވެ. އެ ތިން މީހުންނަކީ:
- އެމްޕީއެލްގެ ޕްރޮކިއުމެންޓް ޑިޕާޓްމެންޓްގެ ކުރީގެ ޗީފް މެނޭޖަރު މުހައްމަދު އައިމަން، ވާރުގެ/ ސ. ފޭދޫ
- އެމްޕީއެލްގެ ޕްރޮކިއުމެންޓް ޑިޕާޓްމެންޓްގެ ކުރީގެ އެސިސްޓެންޓް މެނޭޖަރު ހަސަން ދީދީ، އާޒާދުގެ/ ސ. މަރަދޫ
- އެފްއެސްއެމްގެ ތެޔޮ ބައުޒަރުގެ ޑްރައިވަރެއްގެ ވަޒީފާގައި ކުރިން ހުރި ބަންގްލަދޭޝްގެ ރައްޔިތެއް ކަމަށްވާ ސޮޖިބް
އެފްއެސްއެމްގެ ތެޔޮ އުފުލާ އުޅަނދު ފަހަރުތައް މޮނީޓާ ކުރުމުގެ ގޮތުން އުޅަނދު ފަހަރުގައި ކެމެރާ ހަރުކުރަން ބޭނުންވާ ސިސްޓަމްތަކާއި، އެތަކެތިން ތެޔޮ ދޫކުރަން ބޭނުންކުރާ މީޓަރުތައް ޒަމާނީ މީޓަރުތަކަށް ބަދަލުކޮށް ޑިޖިޓަލް ކޮށް، ލައިވް ރިޕޯޓް ނެގޭނޭ ގޮތަށް ހަދައި ބާޖުތަކުގެ ޓޭންކްތަކުގައި ހުންނަ ތެލުގެ އަދަދު ލައިވްކޮށް މޮނިޓާ ކުރުމަށްޓަކައި އޮޓަމެޓިކް ކޭޖިން ސިސްޓަމްތައް ހަރުކުރުމަށް އަންގަން ވެސް މިއަދު ބޭއްވުނު މާލިއްޔަތު ކޮމިޓިގައިވަނީ ފާސްކޮށްފަ އެވެ.
