ފަތުރުވެރިކަމާއި ތިމާވެއްޓާ ބެހޭ ވުޒާރައިގެ ހުއްދަ ނުނަގައި ދިވެހިރާއްޖޭގައި ފަތުރުވެރިންނަށް ހިދުމަތްދޭ ތަންތަން އިޝްތިހާރުކުރުން މަނާކޮށް "ދިވެހިރާއްޖޭގައި ފަތުރުވެރިންނަށް ހިދުމަތްދޭ ތަންތަން އިޝްތިހާރުކުރުމާ ބެހޭ ގަވާއިދު" އިއްޔެ ގެޒެޓުކޮށްފި އެވެ.
ވުޒާރާއިން ބުނީ އެ ގަވާއިދުގެ މަގުސަދަކީ ރާއްޖެއަކީ ފަތުރުވެރިކަމުގެ މަންޒިލެއްގެ ގޮތުގައި ބޭރު ދުނިޔޭގައި ދައްކާ އިޝްތިހާރުތަކުގައި ހިމެނޭ މައުލޫމާތަކީ ތެދު، ފުރިހަމަ އަދި ފުށުއެރުމެއްނެތް މައުލޫމާތުކަން ކަށަވަރު ކުރުން ކަމަށެވެ. އަދި ފަތުރުވެރިކަން އިޝްތިހާރު ކުރުމުގައި ފަތުރުވެރިކަމުގެ މިންގަނޑުތަކާ އެއްގޮތްވާ ގޮތުގެ މަތީން ޒިންމާދާރުކަމާއެކު އިޝްތިހާރުކުން ކަމަށް ވުޒާރާއިން ބުންޏެވެ.
ވުޒާރާއިން ބުނީ އެ ވުޒާރާގެ ހުއްދައާއެކު ފަތުރުވެރިކަމުގެ ބޭނުމަށް ތަރައްގީކުރަމުން އަންނަ ތަންތަން އިޝްތިހާރުކުރުމުގެ އިހްތިޔާރު ވުޒާރާއަށް ލިބިގެންވާ ކަމަށެވެ. އެގޮތުން ހުއްދަ ހޯދުމަށްޓަކައި ވުޒާރާއިން ކަނޑައަޅާ ޕޯޓަލެއް މެދުވެރިކޮށް ހުއްދަ ހޯދުމަށް ފޯމު ހުށަހެޅޭނެ ކަމަށް ވުޒާރާއިން ބުނެފައިވެ އެވެ.
ފަތުރުވެރިކަމުގެ ބޭނުމަށް ތަރައްގީކުރަމުން އަންނަ މަރުހަލާގައި ތަންތަން އިޝްތިހާރު ކުރެވޭނެ ގޮތްތައްވެސް ވުޒާރާއިން ވަނީ ކަނޑައަޅާފަ އެވެ. އެގޮތުން ވުޒާރާއިން ކުއްޔަށް ދޫކޮށްފައިވާ ތަންތަން އިޝްތިހާރުކުރަން ވާނީ އެ ތަންތަން ކުއްޔަށް ދިނުމަށް ވުޒާރާއާއި ކުއްޔަށް ހިފާފައިވާ ފަރާތާ ދެމެދު ވެފައިވާ އެއްބަސްވުމުގައި ކަނޑައަޅާފައިވާ ދަރަޖައާ ނުވަތަ ގިންތިއާ އެއްގޮތްވާ ގޮތުގެ މަތިން ކަމަށް ގަވާއިދުގައި ބުނެފައިވެ އެވެ. އަދި ކައުންސިލުން ކުއްޔަށް ދޫކޮށްފައިވާ ނުވަތަ އަމިއްލަ ބިންތަކުގައި ފަތުރުވެރިކަމުގެ ބޭނުމަށް ތަރައްގީކުރަމުން އަންނަ ތަންތަން އިޝްތިހާރުކުރަންވާނީ ވުޒާރާއިން ގަބޫލު ކުރާ ދަރަޖައާ ނުވަތަ ގިންތިއާ އެއްގޮތްވާ ގޮތުގެ މަތިން ކަމަށްވެސް ގަވާއިދުގައި ބުނެފައިވެ އެވެ.
އިޝްތިހާރު ކުރުމުގައި އެ ތަނެއްގެ ދަރަޖަ ނުވަތަ ގިންތި ރަނގަޅަށް ދޭހަވާ ގޮތަށް މައުލޫމާތު ހާމަކުރަން ޖެހޭނެ ކަމަށްވެސް ގަވާއިދުގައި ބުނެފައިވެ އެވެ.
ފަތުރުވެރިންނަށް ހިދުމަތްދޭ ތަންތަނުން ޑިޖިޓަލް އިޝްތިހާރު ކުރުމުގައި ހިފަހައްޓަންޖެހޭ މިންގަނޑުތަކަކީ:
- ސޯޝަލް މީޑިއާ ޕްލެޓްފޯމްތަކުގައި ކުރާ އިޝްތިހާރުތަކުގައި، އެއީ އިޝްތިހާރެއްކަން ސާފުކޮށް އެނގޭނެހެން ފާހަގަކޮށް ހާމަކުރުން.
- ހަގީގަތާ ހިލާފު ފޮޓޯތަކާއި ވީޑިއޯތައް ބޭނުން ނުކުރުން.
- ހަގީގަތާ ހިލާފު އޮންލައިން ރިވިއުތަކާއި، ކޮމެންޓުތަކާއި، ރޭޓިންތައް ނެހެދުމާއި ނުދެއްކުން.
- އާޓިފިޝަލް އިންޓެލިޖެންސް (އޭ.އައި) ނުވަތަ މެޝިން ލާނިން ބޭނުންކޮށްގެން އުފައްދާފައިވާ ކޮންޓެންޓް ބޭނުންކުރާނަމަ އެކަން ސާފުކޮށް، ހާމަކުރުން.
- އިޝްތިހާރު ކުރުމުގައި ބޭނުންކުރާ ކޮންޓެންޓަކީ އިޝްތިހާރު ކުރާ ފަރާތުގެ އަމިއްލަ ކޮންޓެންޓަކަށްވުން ނުވަތަ ގާނޫނު ނަންބަރު 2010/23 (ކޮޕީރައިޓާއި އެއާ ގުޅޭ އެހެނިހެން ހައްގުތަކުގެ ގާނޫނު) އާ ހިލާފު ނުވާ ކޮންޓެއްޓެއްކަން ޔަގީންކުރުން.
ވުޒާރާއިން ބުނީ މި ގަވާއިދާ ހިލާފުވާނަމަ 24 ގަޑިއިރު ތެރޭގައި އިޝްތިހާރު ނެގުމަށް ލިޔުމުން އަންގާނެ ކަމަށެވެ. އަދި 24 ގަޑިއިރު ތެރޭގައި އިޝްތިހާރު ނުނަގާނަމަ، ޖޫރިމަނާކުރުމުގެ އިހްތިޔާރު ވުޒާރާއަށް ލިބިގެންވާ ކަމަށް ބުންޏެވެ. އެގޮތުން ގަވާއިދާ ހިލާފުވާ ފުރަތަމަ ފަރު 10،000 ރުފިޔާއިން، ދެވަނަ ފަހަރު 50،000 ރުފިޔާއިން އަދި ތިންވަނަ ފަހަރު 100،000 ރުފިޔާއަށްވުރެ ބޮޑު ނޫން އަދަދަކުން ޖޫރިމަނާ ކުރެވޭނެ ކަމަށް ވުޒާރާއިން ބުންޏެވެ.
ވުޒާރާއިން ބުނީ ތިން ފަރަހަށް ވުރެ އިތުރަށް ގަވާއިދާ ހިލާފުވެއްޖެނަމަ، ލިޔުމުން އެންގުމަކާ ނުލައި، ގަވާއިދާ ހިލާފުވާ ކޮންމެ ފަހަރަކު 100،000 ރުފިޔާއަށްވުރެ ބޮޑު ނޫން އަދަދަކުން ޖޫރިމަނާ ކުރެވޭނެ ކަމަށެވެ.
މި ގަވާއިދު އިއްޔެ ގެޒެޓުގައި ޝާއިއުކުރުމާއެކު ވަނީ ގަވާއިދަށް އަމަލުކުރަން ފަށާފައެވެ.
