ދިވެހިރާއްޖޭގެ ޓެލެކޮމިއުނިކޭޝަން ދާއިރާގައި ފާހަގަކޮށްލެވޭ ތާރީހީ ކާމިޔާބީއެއް ހޯދައި، އުރީދޫ މޯލްޑިވްސްއިން ވަނީ ރާއްޖޭގެ ރިސޯޓަކަށް ފުރަތަމަ ފަހަރަށް ސަބްމެރިން ކޭބަލެއް އަޅައިފަ އެވެ. މި މަޝްރޫއުގެ ދަށުން ސަބްމެރިން ކޭބަލް އަޅައިފައިވަނީ ވަލްޑޯފް އެސްޓޯރިއާ މޯލްޑިވްސް އިތާފުއްޓަށެވެ.

މި ސަބްމެރިން ކޭބަލް މެދުވެރިކޮށް ވަލްޑޯފް އެސްޓޯރިއާ މޯލްޑިވްސް އިތާފުށި، މާފުށި މެދުވެރިކޮށް ހުޅުމާލޭގައި ހުންނަ އުރީދޫ މޯލްޑިވްސްގެ އެންމެ ޒަމާނީ ޑޭޓާ ސެންޓަރާ ވަނީ ގުޅާލާފައެވެ. މި ގުޅުމުގެ ސަބަބުން ވަލްޑޯފް އެސްޓޯރިއާ މޯލްޑިވްސް އިތާފުއްޓަށް ދުނިޔޭގެ ފެންވަރުގެ ކަނެކްޓިވިޓީއާއި އިތުރު ކެޕޭސިޓީއާއި ސްޕީޑު ކަށަވަރުވެގެންދާނެ އެވެ.

މި ތާރީޚީ މަޝްރޫޢު ނިމުން ފާހަގަކުރުމަށްޓަކައި، މިއަދު ވޯލްޑޯފް އެސްޓޯރިއާ މޯލްޑިވްސް އިތާފުށީގައި ހާއްސަ ރަސްމިއްޔާތެއް ވަނީ ބާއްވާފައެވެ. މި ރަސްމިއްޔާތުގައި ޓުއަރިޒަމް އެންޑް އެންވަޔަރަންމަންޓް މިނިސްޓަރު ތާރިގް އިބްރާހީމާއި، އުރީދޫ މޯލްޑިވްސްގެ ސީއީއޯ ހާލިދު އަލް ހަމާދީގެ އިތުރުން ސަރުކާރާއި ވިޔަފާރީގެ އެކި ދާއިރާތަކުގެ އިސްވެރިން ބައިވެރިވެވަޑައިގެންނެވި އެވެ.

މި ރަސްމިއްޔާތުގައި ވާހަކަފުޅުދައްކަވަމުން އުރީދޫ މޯލްޑިވްސްގެ ސީއީއޯ އަދި މެނޭޖިން ޑިރެކްޓަރު ހާލިދު އަލް ހަމާދީ ވިދާޅުވީ، ވޭތުވެދިޔަ 20 އަހަރު އުރީދޫ މޯލްޑިވްސްއަކީ ރާއްޖޭގެ ޓެލެކޮމިއުނިކޭޝަން އިންޑަސްޓްރީގެ އެންމެ ކުރީ ސަފުގައި ހަރަކާތްތެރިވާ ކުންފުންޏެއްކަމަށާއި، ދުނިޔޭގެ ފެންވަރުގެ ޓެކްނޮލޮޖީ ރާއްޖެއަށް ތައާރަފުކޮށް، ކުރިއެރުމަށް އާ މަގުތަކެއް ހުޅުވި، ދިވެހިންގެ ސަގާފަތާއި ދިރިއުޅުމުގެ ވައްޓަފާޅިއަށް ކޮންމެހެން ބޭނުންތެރި ބަޔަކަށް އުރީދޫއިން ވަނީ ވެފަކަމަށެވެ.

އުރީދޫ މޯލްޑިވްސް ރާއްޖޭގެ މުވާސަލާތީ ދާއިރާ ކުރިއެރުވުމަށް 20 އަހަރު ފުރުން ފާހަގަކުރާ މި ދަނޑިވަޅުގައި، މި މުހިންމު ޕްރޮޖެކްޓްގެ ސަބަބުން އެ ކުންފުނީގެ "ޑިޖިޓަލް މޯލްޑިވްސް" ވިސްނުމަށް ދޭ އަހައްމިއްޔަތުކަން ފާހަގަކުރެވެ އެވެ.