މާލޭގެ ބޭރު ތޮށި މަރާމާތުކުރުމަށް ޖަޕާނު ސަރުކާރުން 10.5 މިލިއަން ޑޮލަރުގެ ހިލޭ އެހީ އިއްޔެ ހަމަޖައްސައި ދީފި އެވެ.
ފޮރިން މިނިސްޓްރީން ބުނީ ޖަޕާން ސަރުކާރުގެ އެހީގައި މާލޭ ވަށައި ލާފައިވާ ތޮށި މަރާމާތުކުރުމުގެ މަޝްރޫއަށް ދިނުމަށް ހަމަޖެހިފައިވާ އެހީއާ ގުޅޭ "އެކްސްޗޭންޖް އޮފް ނޯޓްސް"ގައި ދިވެހި ސަރުކަރާއި ޖަޕާން ސަރުކާރާ ދެމެދު އިއްޔެ ސޮއިކޮށްފައިވާ ކަމަށެވެ.
އެކަމަށްޓަކާއި ފޮރިން މިނިސްޓްރީގައި ބޭއްވި ރަސްމިއްޔާތުގައި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބްގެ އާއި ފިނޭންސް މިނިސްޓްރީ އަދި ފޮރިން މިނިސްޓްރީގެ އިސްވެރިން ބައިވެރިވެވަޑައިގެންނެވި އެވެ. އަދި ޖަޕާނުން ރާއްޖެއަށް ކަނޑައަޅާފައި ހުންނަ ސަފީރާއި ޖަޕާން އެމްބަސީ އާއި ޖައިކާ އޮފީހުގެ އިސްވެރިން ވެސް ބައިވެރިވެވަޑައިގެންނެވި އެވެ.
ދިވެހި ސަރުކާރުގެ ފަރާތުން އެ އެއްބަސްވުމުގައި ސޮއިކުރެއްވީ ފޮރިން މިނިސްޓަރު ޑރ. އަބްދުﷲ ހަލީލެވެ. އަދި ޖަޕާން ސަރުކާރުގެ ފަރާތުން ސޮއިކުރެއްވީ މިހާރު ރަސްމީ ދަތުރުފުޅެއްގައި ރާއްޖެ ވަޑައިގެން އުޅުއްވާ ޖަޕާނުގެ ބޮޑުވަޒީރުގެ ހާއްސަ މަންދޫބު، ޕާލަމަންޓްރީ ވައިސް މިނިސްޓާ ފޯ ފޮރިން އެފެއާޒް އިކުއިނޯ އަކިކޯ އެވެ.
މިނިސްޓްރީން ބުނީ އެ "އެކްސްޗޭންޖް އޮފް ނޯޓްސް"ގެ ދަށުން ދިނުމަށް ހަމަޖެހިފައިވާ 10.5 މިލިއަން ޑޮލަރަކީ މާލެ ވަށައި ލާފައިވާ ތޮށި މަރާމާތުކުރުމުގެ މަޝްރޫއުގެ "ކޮންސްޓްރަކްޝަން ފޭސް"އަށް ދޭ އެހީ ކަމަށެވެ.
މިނިސްޓަރު ހަލީލް ވިދާޅުވީ ޖަޕާނުގެ އެހީގައި ލާފައިވާ އެ ތޮށްޓަކީ ހަމައެކަނި ރައްކާތެރިކަމުގެ ބިނާއެއް ނޫން ކަމަށާއި އެ ބިނާއަކީ ދެ ގައުމުގެ ދުވަސްވީ ގާތް ގުޅުން ރަމްޒުކޮށްދޭ ވަރުގަދަ ހެއްކެއް ކަމަށެވެ. އަދި 2004 ވަނަ އަހަރުގެ ސުނާމީ ކާރިސާގައި ވެރިރަށް މާލެއަށް ލިބިގެންދިޔަ ރައްކާތެރިކަމަކީ މާލެ ވަށައި ލާފައިވާ އެ ތޮށި ކަމަށް އޭނާ ވިދާޅުވި އެވެ.
ރާއްޖެ އާއި ޖަޕާނާ ދެމެދު އޮތް ގުޅުމުގެ މައްޗަށް އަލިއަޅުއްވާލައްވައި، ދެ ގައުމު ދެމެދު ސިޔާސީ ގުޅުން ގާއިމްކުރިތާ 60 އަހަރު ފުރުމުގެ މުނާސަބާ 2027 ވަނަ އަހަރު ފާހަގަކުރެވޭނެ ކަމަށް ވެސް ހަލީލް ވިދާޅުވި އެވެ.
ހަލީލް ވިދާޅުވީ ހުޅުވާލެވިފައިވާ މިނިވަން އިންޑޯ ޕެސިފިކް ސަރަހައްދަކަށް ރާއްޖެއިން އަބަދުވެސް ތާއީކުރާނެ ކަމަށާއި ސަރަހައްދީ އަދި ބައިނަލްއަގުވާމީ މައިދާނުގައި ޖަޕާނުން ރާއްޖެއަށް ދޭ އެއްބާރުލުމަށް ޝުކުރު އަދާކުރައްވާ ކަމަށެވެ.
