ޖަޕާނުގެ އުމުރުން 100 އަހަރުން މަތީގެ މީހުންގެ އާބާދީ ފުރަތަމަ ފަހަރަށް 100,000 އިން މައްޗަށް ގޮސްފައިވާއިރު، މުޅި ގައުމުގައި އެ އުމުރުފުރައިގެ 107,677 މީހުން ތިބިކަމަށް އެ ގައުމުގެ ސިއްހީ ވުޒާރާއިން ހާމަކޮށްފިއެވެ.

މި އާބާދީގެ ބޮޑު ބައެއް ހިއްސާކުރަނީ އަންހެނުންނެވެ. އެގޮތުން ޖަޕާނުގެ ސައްތަހާހުން މަތީ އާބާދީގެ 88 އިންސައްތައަކީ އަންހެނުންނެވެ. މިހާރު އެ ގައުމުގައި ހުރި އެންމެ އުމުރުން ދުވަސްވީ މީހަކީ ކިއޯޓޯއަށް ނިސްބަތްވާ އުމުރުން 114 އަހަރުގެ ކިޝިމޯޓޯ ފުޔޯ ކަމަށްވާއިރު، އެންމެ އުމުރުން ދުވަސްވީ ފިރިހެނަކީ ކުމަމޮޓޯއަށް ނިސްބަތްވާ އުމުރުން 112 އަހަރުގެ ކާޓޯ ހިކާރޫއެވެ.

މި ތާރީހީ ލަނޑުދަނޑިއާ ގުޅިގެން ސިއްހީ ވަޒީރު ކެނީޗީރޯ އުއެނޯ މަރުހަބާ ވިދާޅުވި ނަމަވެސް، ޖަޕާނުގެ އުމުރުން ދުވަސްވީ މީހުންގެ އާބާދީ އިތުރުވަމުން ދިއުމަކީ އެ ގައުމުގެ އިޖްތިމާއީ ރައްކާތެރިކަމުގެ ނިޒާމަށް ބޮޑެތި ގޮންޖެހުންތަކެއް ކުރިމަތިކުރުވަމުންދާ ކަމެއް ކަމަށް ވިދާޅުވެފައިވެއެވެ. ޖަޕާނުގެ ސަތޭކަހާހުން މަތީ އާބާދީ ވަނީ 1963 ވަނަ އަހަރު އެންމެ 153 މީހުންގެ އަދަދަކުން، މިއަދު 100,000 އަށްވުރެ މައްޗަށް އުފުލިގެން ގޮސްފައެވެ.

ޖަޕާނުގެ މީހުންގެ އުމުރު ދިގުވުމުގެ ސަބަބުތަކުގެ ތެރޭގައި، މަހާއި، ތަރުކާރީއާއި، ބަތް އަދި ފެޓްސް މަދު، ސިއްހަތަށް ފައިދާހުރި ކާނާ ކެއުން ހިމެނެއެވެ. އަދި އުމުރުން ދުވަސްވީ މީހުން ހިނގުމާއި، ބައިސްކަލު ދުއްވުމާއި، ކަސްރަތު ކުރުމާއި އަދި އާންމު ދަތުރުފަތުރުގެ ނިޒާމު ބޭނުންކުރުން ފަދަ ކަންކަމުގެ ޒަރީއާއިން ހަރަކާތްތެރި ދިރިއުޅުމެއް އުޅުމަށް ލޯބިކުރެއެވެ.

މިއާއެކު، ޖަޕާނުން ދަނީ އާބާދީ ވަރަށް ބޮޑަށް ދަށްވުމުގެ ގޮންޖެހުމާ ކުރިމަތިލަމުންނެވެ. އެގޮތުން އެ ގައުމުގެ ފަރޓިލިޓީ ރޭޓް ވަނީ ފާއިތުވި އަހަރު ރެކޯޑު މިންވަރަކަށް، 1.14 އަށް ދަށްވެފައެވެ. މިއީ ހިޖުރަކުރުމަކާ ނުލައި އާބާދީ ހިފެހެއްޓުމަށް ބޭނުންވާ 2.1 ގެ ނިސްބަތަށްވުރެ މާ ދަށް މިންވަރެކެވެ. 2070 ވަނަ އަހަރަށް އަންނައިރު ޖަޕާނުގެ އާބާދީ 87 މިލިއަނަށް ދަށްވާނެ ކަމަށް ލަފާކޮށްފައިވާއިރު، އުމުރުން 65 އަހަރާއި އެއަށްވުރެ މަތީގެ މީހުން އާބާދީގެ ގާތްގަނޑަކަށް 40 އިންސައްތައަށް އަރާނެ ކަމަށް ލަފާކުރެވެއެވެ.