ރާއްޖޭގެ 60 ވަނަ މިނިވަން ދުވަހާ ގުޅިގެން ހަތަރު ދުވަހަށް ސަރުކާރު ބަންދު ވިޔަސް، ޕާސްޕޯޓުގެ ހިދުމަތް މެދުނުކެނޑި ލިބޭނެ ކަމަށް މޯލްޑިވްސް އިމިގްރޭޝަނުން މިއަދު ބުނެފި އެވެ.

އިމިގްރޭޝަނުން ބުނީ އިމުގާ ޕޯޓަލް މެދުވެރިކޮށް 24 ގަޑިއިރު ޕާސްޕޯޓަށް އެދި ހުށަހެޅޭނެ ކަމަށެވެ. އަދި އުމުރުން 65 އަހަރުން މަތީގެ މީހުންނަށާއި އިމަޖެންސީ ހާލަތްތަކުގައި ޕާސްޕޯޓް ހަދަން ޖެހޭ މީހުންނަށް އެ އޮފީހަށް ހާޒިރުވެގެން ވެސް ޕާސްޕޯޓަށް ހުށަހެޅޭނެ ކަމަށް އިމިގްރޭޝަނުން ބުންޏެވެ.

އެ އޮފީހަށް ހާޒިރުވެގެން ޕާސްޕޯޓަށް ހުށަހެޅުމުގެ ފުރުސަތު އަންނަ ހޮނިހިރު ދުވަހުގެ ހެނދުނު 9:00 އިން މެންދުރު 12:00 އަށް ހުޅުވާލާނެ އެވެ. އަދި ޕާސްޕޯޓާ ހަވާލުވުމަށް ނަމްބަރު ދޫކުރާނީ ވެސް އެ ދުވަހުގެ އެ ގަޑީގަ އެވެ.

އަންނަ އާދިއްތަ ދުވަހާއި ހޯމަ ދުވަހު އިމިގްރޭޝަނަށް ހާޒިރުވެގެން ޕާސްޕޯޓަށް ހުށަހެޅޭނީ ހެނދުނު 8:30 އިން މެންދުރު ފަހު 2:00 އަށެވެ. އަދި ޕާސްޕޯޓާ ހަވާލުވާން ނަމްބަރު ދޫކުރާނީ ވެސް ހަމަ އެ ގަޑީގަ އެވެ.

އިމިގްރޭޝަނުން ބުނީ މެޑިކަލް އެމަޖެންސީތަކުގައި 9555333 އަށް ގުޅައިގެން ޕާސްޕޯޓާ ގުޅޭ ހިދުމަތްތައް ހޯދޭޏެ ކަމަށެވެ.

ބަންދު ދުވަސްތަކުގައި ހިދުމަތް ދޭނީ ހަމައެކަނި މާލެ ސަރަހައްދުގައި ހިމެނޭ ޕާސްޕޯޓު އޮފީސްތަކުން ކަމަށް ވެސް އިމިގްރޭޝަނުން ބުންޏެވެ.