އާޓިފިޝަލް އިންޓަލިޖެންސް (އޭއައި) ނުވަތަ އެނޫންވެސް އެފަދަ ޓެކްނޮލޮޖީތައް ބޭނުންކޮށްގެން އެޑިޓްކޮށްފައިވާ ފޮޓޯތަކަކީ، ޕާސްޕޯޓުގެ ފޮޓޯ މިންގަނޑާ ހިލާފު ފޮޓޯތަކެއް ކަމަށް މޯލްޑިވްސް އިމިގްރޭޝަނުން މިއަދު ހާމަކުރައްވައިފި އެވެ.

ޕާސްޕޯޓަށް ހުށަހަޅާ ފޮޓޯއާ ގުޅޭގޮތުން އިމިގްރޭޝަނުން މިއަދު ނެރުނު އިއުލާނެއްގައި ބުނީ، ޕާސްޕޯޓަށް އެދި ހުށަހަޅާއިރު އޭއައި ބޭނުންކޮށްގެން ތައްޔާރުކޮށްފައިވާ ނުވަތަ އެޑިޓްކޮށްފައިވާ ފޮޓޯ ހުށަނޭޅުމަށް އިލްތިމާސްކުރާ ކަމަށެވެ. އަދި މިފަދަ ފޮޓޯތަކަކީ ޕާސްޕޯޓް ފޮޓޯ މިންގަނޑާ ހިލާފު ފޮޓޯތަކެއްގެ ގޮތުގައި އެ އިދާރާއިން ވަނީ ކަނޑައަޅަޅާފަ އެެވެ.

އިމިގްރޭޝަނުން އިތުރަށް ބުނިގޮތުގައި، ޕާސްޕޯޓަކީ މީހާގެ އައިޑެންޓިޓީ ނުވަތަ ސިފަ ކަށަވަރުކޮށްދޭ މުހިންމު ސެކިއުރިޓީ ލިޔެކިޔުމަކަށް ވާތީ، ފޮޓޯ ހުށަހެޅުމުގައި އާންމު ރައްޔިތުން މިހާރަށްވުރެ ބޮޑަށް ސަމާލުވުމަކީ ކޮންމެހެން ބޭނުންތެރި ކަމެކެވެ. އޭއައި ބޭނުންކޮށްގެން ފޮޓޯ އިސްލާހުކުރުމަކީ މީހާގެ އަސްލު ސިފައަށް ބަދަލު އަތުވެދާނެ ކަމެއް ކަމަށްވާތީ، މިއީ ސަލާމަތީ ގޮތުން ބަލާއިރު ބަލައިގަނެވޭނެ ކަމެއް ނޫންކަން އެ އިދާރާއިން ފާހަގަކުރި އެވެ.

އެގޮތުން، މީގެ ކުރިންވެސް އިމިގްރޭޝަނުން ވަނީ ޕާސްޕޯޓަށް އެދި ހުށަހަޅާ ފޮޓޯތަކުގައި އާންމުކޮށް ދިމާވާ މައްސަލަތައް ހައްލުކުރުމަށާއި، ފޮޓޯ މިންގަނޑުތަކަށް އާންމުން އަހުލުވެރިކުރުވުމަށް ތަފާތު ސެޝަންތަކެއް ބާއްވާފަ އެވެ. އެ ބައްދަލުވުންތަކުގެ މައިގަނޑު މަގްސަދަކީ ފޮޓޯ ނެގުމުގައި ކަނޑައެޅިފައިވާ ބައިނަލްއަގުވާމީ މިންގަނޑުތަކާ އެއްގޮތަށް އަމަލުކުރުމަށް ބާރުއެޅުމެވެ.

ދުނިޔޭގެ ޕާސްޕޯޓު ރޭންކިންގައި ދިވެހިރާއްޖޭގެ ޕާސްޕޯޓަކީ އިތުރަށް ވަރުގަދަވަމުން އަންނަ ޕާސްޕޯޓެއްކަން ފާހަގަކޮށްލެވެ އެވެ. މިހާރުވެސް ދެކުނު އޭޝިއާ ސަރަހައްދުގައި އޮތް އެންމެ ބާރުގަދަ ޕާސްޕޯޓުތަކުގެ ތެރޭގައި ދިވެހި ޕާސްޕޯޓު ހިމެނެ އެވެ. މިފަދަ ހަރުދަނާ މިންގަނޑުތައް ހިފެހެއްޓުމަކީ ޕާސްޕޯޓުގެ ސައްހަކަމާއި އިތުބާރު ބައިނަލްއަގުވާމީ ފެންވަރުގައި ދެމެހެއްޓުމަށް އެޅޭ މުހިންމު ފިޔަވަޅެއްކަމަށް އެ އިދާރާއިން ބުންޏެވެ.