ޑޮނަލްޑް ޓްރަމްޕްގެ ވެރިކަމުގައި އެމެރިކާއިން، އދ.ގެ ސަގާފަތާއި ތައުލީމާ ބެހޭ އިދާރާ ޔުނެސްކޯގެ މެންބަރުކަމުން ދެވަނަ ފަހަރަށް ވަކިވުމަށް ނިންމާފައިވާކަން ރަސްމީކޮށް އިއުލާންކޮށްފިއެވެ.

ދުނިޔޭގެ ޞިއްޙަތު ޖަމިއްޔާ (WHO) އާއި ޕެރިސް މުއާހަދާ އިން ވެސް ވަކިވެފައިވާ އެމެރިކާއިން ޔުނެސްކޯއިން ރަސްމީކޮށް ވަކިވަނީ އަންނަ އަހަރުގެ ޑިސެމްބަރު މަހު ކަމަށްވާއިރު، މި އިދާރާގެ ޖުމްލަ ބަޖެޓުގެ ގާތްގަނޑަކަށް އަށް ޕަސެންޓް ފޯރުކޮށްދެނީ އެމެރިކާއިންނެވެ.

ޖުމްލަ 194 މެންބަރު ގައުމު ހިމެނޭ ޔުނެސްކޯއިން ވަކިވާން އެމެރިކާއިން ނިންމީ އެ ޤައުމުން އިސްރާއީލާއި ގުޅިގެން ޣައްޒާގައި ހިންގާ ޖަރީމާތަކަށް ޔުނެސްކޯއިން ފާޑު ކިޔާފައި ވަނިކޮށެވެ. އެމެރިކާއިން ބުނީ ޔުނެސްކޯއަކީ އެމެރިކާގެ “އެމެރިކާ ފަސްޓް” ސިޔާސަތާއި ފުށުއަރާ އެޖެންޑާއެއް ގެންގުޅޭ ޖަމިއްޔާއެކެވެ. 2011 ވަނަ އަހަރު ޔުނެސްކޯއިން ފަލަސްތީނަށް މެންބަރުކަން ދިނުމަކީ އެމެރިކާގެ ސިޔާސަތާއި ޚިލާފު، އިސްރާއީލާއި ދެކޮޅު ފިކުރު އދ.ގައި ފެތުރުމަށް މަގުފަހިވި ކަމެއް ކަމަށް ވެސް އެމެެރިކާ ސަރުކާރުން ބުންޏެވެ.

މީގެ ކުރިންވެސް އެމެރިކާއިން ޔުނެސްކޯއިން ވަކިވިއެވެ. އެއީ ޓްރަމްޕުގެ ފުރަތަމަ ދައުރުގައެވެ. ނަމަވެސް، ފަހުން ވެރިކަމަށް ވަޑައިގެންނެވި ރައީސް ޖޯ ބައިޑެންގެ ދުވަސްވަރު އެ ނިންމުން ބަދަލުކުރައްވައި އެމެރިކާ އަނބުރާ ޔުނެސްކޯއާއި ގުޅުނެވެ.