މަތީ ތައުލީމު ހާސިލްކުރުމަށް ސަރުކާރުން ދޭ ސްޓޫޑެންޓް ލޯނު މި އަހަރު ލިބޭ ދަރިވަރުންގެ ވަގުތީ ލިސްޓު މިއަދު އާންމުކޮށްފި އެވެ.
ހަޔަ އެޑިއުކޭޝަން މިނިސްޓްރީން ބުނީ ރާއްޖެ އާއި ރާއްޖެއިން ބޭރުން މަތީ ތައުލީމާއި ތަމްރީނު ހޯދުމަށް ލޯނަށް އެދި އެޕްލިކޭޝަން ހުށަހެޅި ދަރިވަރުންގެ ވަގުތީ ނަތީޖާ މިހާރު މިނިސްޓްރީގެ ވެބްސައިޓުގައި އާންމުކޮށްފައިވާ ކަމަށެވެ.
އެ ނަތީޖާއާ ގުޅޭ ގޮތުން އެއްވެސް ޝަކުވާއެއް ހުށަހަޅަން ބޭނުންވާ ނަމަ, އަންނަ މަހުގެ ތިންވަނަ ދުވަހުގެ މެންދުރު ފަހު 1:00 ގެ ކުރިން މިނިސްޓްރީއަށް އީމެއިލްކުރުމަށް އެދޭ ކަމަށް މިނިސްޓްރީން ބުންޏެވެ.
ރާއްޖެ އާއި ރާއްޖެއިން ބޭރުން މަތީ ތައުލީމު ހާސިލުކުރަން ސަރުކާރުން ދޫކުރާ ސްޓޫޑެންޓް ލޯނު ސްކީމަށް އެދި މި އަހަރު 1،300 އަށް ވުރެ ގިނަ ކުދިން ފޯމު ހުށަހަޅާފައިވާ ކަމަށް ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރު މިދިޔަ މެއި މަހު ވަނީ ވިދާޅުވެފަ އެވެ.
މި އަހަރު އެ ލޯނަށް އެދި ހުށަހަޅަން 500 ފުރުސަތު ހުޅުވާލީ މިދިޔަ މާޗު މަހުގެ 29 ވަނަ ދުވަހު އެވެ.
ރައީސް ޑރ. މުހައްމަދު މުއިއްޒު މި އަހަރު ވަނީ ސްޓޫޑެންޓް ލޯނު އަނބުރާ ދައްކާއިރު އެޑްމިނިސްޓްރޭޓިވް ފީގެ ގޮތުގައި ކުރިން ނަގަމުން އައި އެއް ޕަސެންޓު ނުނަގަން ނިންމަވައިފަ އެވެ.
