ވެލާނާ އިންޓަނޭޝަނަލް އެއާޕޯޓް (ވީއައިއޭ) ގެ އާ ޓާމިނަލް ހުޅުވުމުގެ ކުލަގަދަ ރަސްމިއްޔާތާ ދިމާކޮށް، އެއާޕޯޓުގެ ވައިގެ ސަރަހައްދު ވަގުތީ ގޮތުން ދޮޅުގަޑިއިރަށް ބަންދުކުރުމަށް ނިންމައިފިއެވެ. މި މަހުގެ 26 ވަނަ ދުވަހު ބާއްވާ މި ރަސްމިއްޔާތަށް ހާއްސަކޮށް، މޯލްޑިވްސް އެއާޕޯޓްސް ކޮމްޕެނީ ލިމިޓަޑް (އެމްއޭސީއެލް) އިން ވަނީ މި އިންތިޒާމް ހަމަޖައްސާފައެވެ.

އެމްއޭސީއެލް އިން ވިދާޅުވެފައިވާ ގޮތުގައި، އާ ޓާމިނަލް ހުޅުވާ ރޭ 8:30 އިން ފެށިގެން ރޭގަނޑު 10:00 ޖެހުމާ ހަމައަށް ވީއައިއޭގެ ވައިގެ ސަރަހައްދު ބަންދުވާނެ އެވެ. މި މުއްދަތަކީ ޖުމްލަ އެއްގަޑިއިރާއި ބައިގެ މުއްދަތެކެވެ.

ރާއްޖޭގެ 60 ވަނަ މިނިވަން ދުވަހާ ދިމާކޮށް، މި މަހުގެ 26 ގައި މި ޓާމިނަލް ހުޅުވުމަށް ހަމަޖެހިފައިވާއިރު، މި ރަސްމިއްޔާތަކީ ވަރަށް ކުލަގަދަ އަދި ތާރީޚީ ރަސްމިއްޔާތެއްގެ ގޮތުގައި ބޭއްވުމަށް އެމްއޭސީއެލް އިން ވަނީ ނިންމާފައެވެ. މިހާރުވެސް އެއާޕޯޓް ހުޅުވުމަށް ވާންޖެހޭ ފަހުގެ ތައްޔާރީތައް ދަނީ ވަމުންނެވެ.

މި ޓާމިނަލަކީ ރާއްޖޭގެ ފަތުރުވެރިކަމާއި ވައިގެ ސިނާއަތުގެ އެންމެ ބޮޑު މަޝްރޫއެވެ. ޒަމާނީ ފެންވަރަށް ވެލާނާ އިންޓަނޭޝަނަލް އެއާޕޯޓް ތަރައްގީ ކުރުމަށް ކުރިއަށްގެންދާ މަޝްރޫއުތަކުގެ ތެރެއިން އެންމެ ބިޔަ އަދި އެންމެ މުހިންމު މަޝްރޫއުކަމަށް މި ޓާމިނަލްވަނީ ވެފައެވެ.

ފަހުގެ ޓެކްނޮލޮޖީގެ ވަސީލަތްތަކާއެކު މި ޓާމިނަލް ހުޅުވިގެންދިޔުމަކީ ދިވެހިރާއްޖޭގެ މުޅި އިގްތިސާދަށް، ޚާއްސަކޮށް ފަތުރުވެރިކަމާއި ދަތުރުފަތުރުގެ ދާއިރާއަށް ބޮޑެތި ކުރިއެރުންތަކެއް ގެނުވާނެ ކަމެއް ކަމަށް ބެލެވެ އެވެ. ރާއްޖޭގެ ވައިގެ ދަތުރުފަތުރުކުރުމުގެ ސިނާއަތަށް މި ޓާމިނަލް އިން އިންގިލާބީ ބަދަލުތަކެއް ގެންނާނެކަމަށް އުންމީދު ކުރެވެ އެވެ.