އެމެރިކާގެ އެހީ ނުލިބިއްޖެނަމަ ޔޫކްރޭނަށް ހަ މަހަށްވުރެ ގިނަ ދުވަހު ދިރިނުހުރެވޭނެ ކަމަށް ޔޫކްރޭންގެ ރައީސް ވޮލޮޑިމިއާ ޒެލެންސްކީ ވިދާޅުވެއްޖެ އެވެ.

އެމެރިކާގެ ފަރާތުން ޒެލެންސްކީ މިހާރު އެދެނީ މަދުވެގެން އިތުރު ދިހަ ޕެޓްރިއޮޓް މިސައިލް ސިސްޓަމް ދިނުމަށެވެ. މިހާރުވެސް ޔޫރަޕްގެ ޤައުމުތަކުން ދީފައިވާ 6 ސިސްޓަމް ޔުކްރޭނުގައި އެބަހުއްޓެވެ.

އެމެރިކާއިން މީގެ ކުރިން ބުނެފައިވަނީ ރަޝިޔާ އާއި ދެކޮޅަށް ޔުކްރޭނަށް އެހީތެރި ނުވާނެ ކަމަށެވެ. ނަމަވެސް، އެ ނިންމުން ބަދަލުކުރައްވައި އެމެރިކާގެ ރައީސް ޓްރަމްޕް ވިދާޅުވީ ނޭޓޯގެ ޤައުމުތަކުން އަގު ދައްކާ މަތިން ޔުކްރޭނަށް އިތުރު ޕެޓްރިއޮޓް ސިސްޓަމް ތައް ލިބޭނެ މަހު ފަހިކޮށްދޭނެ ކަމަށެވެ.

މި ހަތިޔާރުތައް އެމެރިކާއިން ފޮނުވާނީ ޖަރުމަނު، ނޯވޭ، ޑެންމާކް، ސްވިޑެން، ފިންލޭންޑް، އިނގިރޭސިވިލާތް، ކެނެޑާ، އަދި ނެދަލެންޑްސް އަށެވެ. އޭގެ ފަހުން އެ ޤައުމުތައް ކިއެވްއަށް މިތަކެތި ގެންދާނެ ކަމަށް ރިޕޯޓުތައް ބުނެ އެވެ.

ޔޫކްރޭންގެ އިރުމައްޗާއި ދެކުނުގައި ރަޝިޔާގެ ޙަމަލާތައް ވަރުގަދަ ކުރަމުންދާއިރު، ކައުންސިލް އޮން ފޮރިން ރިލޭޝަންސް އިން ބުނާ ގޮތުގައި 2022 ވަނަ އަހަރުގެ ފެބްރުއަރީ މަހު ރަޝިޔާއިން ޔުކްރޭނަށް އަރައިގަތް ފަހުން އެމެރިކާއިން ވަނީ ޔޫކްރޭނު ސަރުކާރަށް 128 ބިލިއަން ޑޮލަރުގެ އެހީ ދީފައެވެ. އޭގެފަހުން މިދިޔަ އަހަރު ކުއްލި ހާލަތުގައި ޖުމްލަ 182.8 ބިލިއަން ޑޮލަރު ދޫކޮށްފައިވެއެވެ.

ހަނގުރާމަ ފެށުނު ފަހުން އެމެރިކާ އަކީ ޔޫކްރޭނަށް އެންމެ ބޮޑު އެހީތެރިކަމެއް ފޯރުކޮށްދީފައިވާ ޤައުމެވެ. އެގޮތުން ޔޫކްރޭންގެ ދިފާޢީ ޤާބިލްކަން އިތުރު ކުރުމަށް އެމެރިކާ އިން ދަނީ ޕެޓްރިއޮޓް މިސައިލް ސިސްޓަމްތަކާއި، އެމް1 އެބްރަމްސް ޓޭންކްތަކާއި، ހިމާސް ރޮކެޓް ލޯންޗަރތައް ހިމެނޭ ގޮތަށް ގިނަ ޢަދަދެއްގެ ޒަމާނީ ހަތިޔާރު ފޯރުކޮށްދިނުމަށް މުހިންމު ދައުރެއް އަދާކުރަމުންނެވެ. އަދި ރަޝިއާއަށް ދަތިކުރުމުގެ ދިޔަވަޅުތައް އަޅައި ރަޝިއާގެ އެތައް ބިލިއަން ރުބެލް އެއް ވަނީ ހިފަހައްޓައި އިޤްތިޞަދީ ގޮތުން ދަތި ކޮށްފަ އެވެ. ނަމަވެސް އެމެރިކާ އާއި ޔޫރަޕުން ހީކުރި ގޮތާއި ޚިލާފަށް ރަޝިއާގެ ބާރު ދަނީ ގަދަ ވަމުންނެވެ.