އިކޮނޮމިކް އެންޑް ޓްރޭޑް މިނިސްޓަރު މުހައްމަދު ސައީދުގެ ބައްޕަ، ސައީދު އަބްދުﷲ، ވިނަރެސް / ހއ.ތުރާކުނު އަވަހާރަވެއްޖެ އެވެ. މިނިސްޓަރު ސައީދުގެ ބައްޕަ އަވަހާރަވީ ރޭގެ ވަގުތެއްގަ އެވެ.

ހއ.ތުރާކުނުގެ ވެރިކަމުގެ ދާއިރާގެ އިސް މަގާމުތަކުގައި 20 އަހަރަށްވުރެ ގިނަ ދުވަހު ހިދުމަތް ކުރައްވާފައިވާ، ސައީދު އަބްދުﷲ އަވަހާރަވުމުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ މަރްހޫމްގެ އާއިލާއަށް ތައުޒިޔާ ވިދާޅުވިދާޅުވެފަ އެވެ.

ރައީސް އެކްސްގައި ކުރެއްވި ޕޯސްޓެއްގައި ވިދާޅުވީ ސައީދު އަބްދުﷲ އަވަހާރަވި ހަބަރު އެއްސެވީ ނުހަނު ފުންހިތާމައާއެކުގައި ކަމަށާއި މަރުހޫމް ސައީދު އަބްދުﷲ އަކީ ގަދަރުވެރި ހުލްގުހެޔޮ، ދީންވެރި، ހަރުދަނާ ޝަހްސިއްޔަތެއް ކަމަށެވެ.

ރައީސް ވިދާޅުވީ މަރުހޫމްގެ އާއިލާއަށް ނުހަނު އިހްލާސްތެރިކަމާއެކު ތައުޒިޔާ ދަންނަވައި، ކެތްތެރިކަން ދެއްވުން އެދި ދުއާ ކުރައްވާ ކަމަށެވެ. މާތްﷲގެ ރުއްސެވުމާއި ފުއްސެވުމުގައި، ސުވަރުގޭގެ މަތިވެރި ނިއުމަތާއި ރަހްމަތުގައި މަރުހޫމް ސައީދު އަބްދުﷲ ލެހެއްޓެވުން އެދި ދުއާ ކުރައްވާ ކަމަށް ވެސް ރައީސް ވިދާޅުވިއެވެ.