ސީރިއާގައި ޙަރަކާތެރިވާ ޔަހޫދީންނާއި އަދި އެމީހުންގެ ގާތް ގުޅުން އޮންނަ ދުރޫޒީން އެއްވެ މުސްލިމު ބަދަވީންނާއި ދެކޮޅަށް ދެމުންދާ ޙަމަލާތައް ހުއްޓަިލުމަށް އެއްބަސް ވެއްޖެއެވެ. މަޝްވަރާ ތަކަށްފަހު ޙަމަލާ ބަދަލުކުރުން ހުއްޓައިލިއިރު ސީރިއާގެ ދެކުނުގައި ހިނގާ ލޭއޮހޮރުވުންތަކުގައި 500 އަށް ވުރެ ގިނަ މީހުން މަރުވެ އަދި ޒަޚަމް ވެފައިވާ ކަމަށް ސީރިއަން ނެޓްވޯކް ފޯ ހިއުމަން ރައިޓްސް އިން ކަށަވަރުކޮށްދެއެވެ.

މި ހަނގުރާމަ ފެށުނީ ދުރީޒީންނާއި މުސްލިމު ބަދަވީ ޤަބީލާ ތަކާއި ދެމެދު ހިނގަމުންދިޔަ ހަމަނުޖެހުން ކޮންޓުރޯލް ކުރުމަށް ސީރިއާ ސަރުކާރުން ސްވެއިދާއަށް ސިފައިން ފޮނުވުމުންނެވެ. އެއާއިއެކު އިސްރާއީލު ސަރުކާރުން ދުރޫޒީންނަށް އެހީ ފޯރުކޮށްދިން ކަމަށް ވެއެވެ. އަދި ހަމަނުޖެހުން ބޮޑުވެ އިސްރާއީލުގެ ސިފައިންގެތެރެއިން ބަޔަކު ހަތިޔާރާއި ވެހިކަލްތަކުގައި ސުވެއިދާއަށް ވަނެވެ. މީގެ އިތުރުން އޭގެ ގަޑިއިރުތަކެއްގެ ކުރިން އިސްރާއީލުން ސީރިއާގެ އަސްކަރީ ހެޑްކުއާޓަރުގެ މައި ގޭޓަށް އަމާޒުކޮށް ވައިގެ މަގުން ބޮން ވެސް އެޅިއެވެ.

މުޙައްލިލުން ބުނާ ގޮތުގައި އިސްރާއީލުގެ ސަލާމަތީ ބާރުތަކުން ސީރިއާގެ ނާޒުކު ތަންތަނަށް ބޮން އެޅީ ދުރޫޒީންނަށް ޙިމާޔަތް ދިނުމަށް ސީރިއާގެ ސަރުކާރަށް އިންޒާރު ދިނުމުގެ ގޮތުންނެވެ. އަދި އިސްރާއީލުން ހިފާފައިވާ ގޯލާނުގައި ދިރިއުޅޭ އަދި އިސްރާއީލުގެ ސިފައިންގެ ތެރޭގައި ތިބި ދުރޫޒީންގެ އާބާދީ ހިމާޔަތް ކުރުމަށްޓަކައެވެ.

ތުރުކީއާއި އުރުދުން އަދި އެމެރިކާގެ ސަފީރު ތޯމަސް ބަރަކް އާއި މަޝްވަރާކޮށްގެން ހަނގުރާމަ ހުއްޓާލުމުގެ އެއްބަސްވުމެއް ކުރިއަށް ގެންދިޔަ ނަމަވެސް، އަދިވެސް ނައެއް ސަރަޙައްދުތަކުގައި ކޮންމެވެސް ވަރަކަށް ހަމަނުޖެހުންތައް ކުރިއަށް އެބަދެއެވެ. އިއްޔެ އެ ސަރަޙައްދުން ސީރިއާގެ ސިފައިން މުޅިން ފައިބައިގެން ދިޔަ ނަމަވެސް ދުރޫޒީންނަށް އެ ސަރަޙައްދުގެ ފުރިހަމަ ބާރާއި މިނިވަންކަން ދިނުމަށަ ބަދަވީ މިލިޝިއާތަކުން ދެކޮޅު ހަދައެވެ.

ސީރިއާގެ އިންޓީރިއާ މިނިސްޓްރީން މިހާރު ހަމަޖެހުން ޤާއިމް ކުރުމަށް ޚާއްޞަ ޔުނިޓެއް ޤާއިމްކޮށްފައިވާއިރު، އެ ސަރަހައްދުގައި ތިބި 80،000 އަށް ވުރެ ގިނަ މީހުންގެ ގެދޮރު ވަނީ ގެއްލިފައެވެ.