އިޒްރޭލުން ސީރިއާއަށް ދިން ވައިގެ ހަމަލާތަކުގައި އެމެރިކާ ބައިވެރިއެއް ނުވާ ކަމަށް ޕެންޓަގަން އިން ބުނެފި އެވެ. ނަމަވެސް، އިޒްރޭލުގެ މީޑިއާ ރިޕޯޓުތަކުގައި، ސީރިއާއަށް ދިން މި ހަމަލާ ތަކަކީ އެމެރިކާ އާއި ގުޅިގެން ދީފައިވާ ހަމަލާތަކެއް ކަމަށް ބުނެފައިވެ އެވެ.

އަންގާރަ ދުވަހު އިޒްރޭލުގެ މަތިންދާބޯޓުތަކުން ވަނީ ސީރިއާގެ ހުޅަނގު ދެކުނަށް ހަމަލާ ދީފަ އެވެ. އިޒްރޭލުގެ އަސްކަރިއްޔާއިން ނެރުނު ބަޔާނެއްގައިވާ ގޮތުން، ބޮޑުވަޒީރު ބެންޖަމިން ނަތަންޔާހޫ ވަނީ ސީރިއާގެ ސުވެއިދާ ގަވަރުނަރޭޓްގައި ހުރި ސީރިއާގެ ސިފައިންނާއި އަސްކަރީ އުޅަނދުތަކަށް ހަމަލާ ދިނުމަށް ސިފައިންނަށް އަންގާފައެވެ.

ސީރިއާގެ ދިފާއީ ވަޒީރު މުރުހަފް އަބޫ ގާސިރާ ވަނީ ސުވެއިދާގެ ލީޑަރުންނާއި މަޝްވަރާ ކުރުމަށްފަހު، އެ ސަރަހައްދުގައި ހަމަލާ ދިނުން ހުއްޓާލައިފިކަމަށް އިޢުލާންކޮށްފައެވެ. ސީރިއާގެ ނިއުސް އެޖެންސީ ސަންއާ އިން ރިޕޯޓުކޮށްފައިވާ ގޮތުގައި، ސީރިއާ ސިފައިން ވަނީ ސުވެއިދާއިން އަސްކަރީ އުޅަނދުތައް ވެސް ބާލަން ފަށާފަ އެވެ.

ހޯމަ ދުވަހު، ބަދަވި ގަބީލާގެ ހަނގުރާމަވެރިންނާއި ދްރޫޒީ ވަންހައިގެ މިލިޝިއާތަކާ ދެމެދު ހިނގި ކުރިމަތިލުންތަކުގައި 30 އަށްވުރެ ގިނަ މީހުން މަރުވެ، 100 އަށްވުރެ ގިނަ މީހުން ޒަޚަމްވެފައިވެ އެވެ.