ހައްޖަށް ދައްކާ ފައިސާއިން ހައްޖު ކޯޕަރޭޝަނުން ޒަކާތް ދައްކަން ޖެހޭނެ ކަމަށް އިސްލާމީ ފަތުވާދޭ އެންމެ މަތީ މަޖިލީހުން ބުނެފިއެވެ.
އިސްލާމި ފަތުވާދޭ އެންމެ މަތީ މަޖިލީހުން މިއަދު ނެރުނު ފަތުވާގައި ބުނީ ޙައްޖު ކޯޕަރޭޝަން ލިމިޓެޑަށް، ހައްޖަށް ދިއުމަށް ދައްކާ ފައިސާއިން ޒަކާތް ދިނުމާ ގުޅޭ ގޮތުން އެ މަޖިލީހަށް މައްސަލައެއް ހުށަހަޅާފައިވާ ކަމަށެވެ.
އެ މައްސަލައިގައި ޙައްޖު ކޯޕަރޭޝަނުން ފަތުވާ މަޖިލީހަށް ދިން މަޢުލޫމާތުގެ އަލީގައި، މަޖިލީހުގެ މެންބަރުން އެ މައްސަލަ ދިރާސާކުރުމަށްފަހު ނިންމާފައިވަނީ އާންމު ރައްޔިތުން ހައްޖަށް ދިއުމަށް ހައްޖު ކޯޕަރޭޝަނަށް ދައްކާ ފައިސާއިން ޒަކާތް ދައްކަން ޖެހޭނީ އެ ކޯޕަރޭޝަނުން ކަމަށް ފަތުވާ މަޖިލީހުން ބުންޏެވެ.
ހައްޖަށް ދިއުމުގެ ޖާގަ ކިއުއިން، ޖާގަ ރިޒާވްކޮށް ލިސްޓުގައި ހިމެނެނީ ޙައްޖަށް ދިއުމަށް އެކައުންޓް ހުޅުވުމުން އެ އެކައުންޓުގެ ވެރިފަރާތުން އެއިރެއްގައި ކަނޑައަޅާފައިވާ ހައްޖުގެ އަގުގެ %75 ހަމަކުރުމުންނެވެ.
ހައްޖަށް ދިއުމަށް ހައްޖު ކޯޕަރޭޝަނުން މިހާރު ކަނޑައަޅާފައިވާ އަގަކީ 69،965 ރުފިޔާއެވެ.
މީގެ އިތުރުން، ރާއްޖޭގައި ޒަކާތުގެ ނިސާބުގެ މިންވަރު ކަނޑައަޅަނީ ރިހީގެ އަގަށް ބަލައިގެން ކަމަށްވާއިރު، ރިހީގެ އަގަށް އަންނަ ބަދަލާ ގުޅިގެން ޒަކާތުގެ ގޮތުގައި ދައްކަންޖެހޭ ފައިސާގެ މިންވަރުވެސް ބަދަލުވެ އެވެ.
މިހާރު ރާއްޖޭގައި ޒަކާތުގެ ނިސާބަކީ 9،264.15 ރުފިޔާއެވެ.
