މިސްކިތްތަކުގައި ބަަހައްޓާފައި ހުންނަ ސުތުރާތައް ނަގަން މާލެ ސިޓީ ކައުންސިލުގައި އެދޭނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައިދު ވިދާޅުވެއްޖެ އެވެ.

މިނިސްޓަރު ޝަހީމް ވިދާޅުވީ، ފަހަކަށް އައިސް ނަމާދު ކުރާއިރު ކުރިމަތީގައި ބެހެއްޓުމަށްޓަކައި ސުތުރާގެ ނަމުގައި އެކި ސިފަ ސިފައިގެ ތަކެތި ހަދައިގެން މިސްކިތްތަކުގެ ތެރޭގައި ބަހައްޓައިގެން އުޅޭ ކަމަށެވެ. މިގޮތަށް ތަކެތި ބެހެއްޓުމަކީ ރަސޫލާ އާއި އަސްހާބުން އަދި ހެޔޮކަން ބޮޑުވެގެންވާ ތިންގަރުނުގައި ވެސް ކަން ކޮށްފައިވާ ގޮތް ނޫން ކަން މިނިސްޓަރު ފާހަގަކުރެއްވި އެވެ.

ސުންނަތުގައި ބަޔާންވެގެންވާ ސުތުރާގެ މަފްހޫމާއި ހިލާފު މިފަދަ ކަންކަން ފެތުރިގެން ދިއުމަކީ ރަނގަޅު ގޮތެއްނޫން ކަން ފާހަގަކުރައްވަމުން މިނިސްޓަރު ވިދާޅުވީ މިސްކިތްތަކުގައި ސުތުރާގެ ނަމުގައި މިފަދަ ތަކެތި ބެހެއްޓުމުގެ ބަދަލުގައި ސުންނަތުން ވާރިދުވެފައިވާ ގޮތަށް އަމަލުކުރުން ބުއްދިވެރި ކަމަށެވެ. އެއީ ތަނބެއް ނުވަތަ ފާރެއް ނުވަތަ އެނޫންވެސް އާންމު ބޭނުމަކަށް ހުންނަ އެއްޗެއް ސުތުރާގެ ގޮތުގައި ބޭނުންކުރުން ކަމަށް މިނިސްޓަރު ވިދާޅުވި އެވެ.

މިސްކިތްތަކުގައި ބަަހައްޓާފައި ހުންނަ ސުތުރާތައް ނަގަން މާލެ ސިޓީ ކައުންސިލުގައި އެދޭނެ ކަމަށް މިނިސްޓަރު ޝަހީމް ވިދާޅުވެފައިވާއިރު، ފަތުވާ މަޖިލީހުން ވެސް ވަނީ މި މައްސަލައާ ގުޅިގެން ދާދި ފަހުން ފަތުވާއެއްވެސް ނެރެފަ އެވެ. އެގޮތުން، ރަސޫލާގެ ޒަމާނުގައި މިސްކިތްތަކުގައި ސުތުރާއަށް ބޭނުންޖެހިފައި ވީއިރުވެސް އެކަމަށް ހާއްސަ އެއްޗެއް ބަަހައްޓާފައި ނުވާކަން އެނގޭ ކަމަށް ފަތުވާ މަޖިލީހުން ނެރުނު ފަތުވާގައިވެ އެވެ.