ފަތުވާ މަޖިލީހަށާއި ފުލުހުންނަށް އަމާޒުކޮށް، އެމްޑީޕީގެ ކުރީގެ ޗެއާޕާސަން ރީކޯ މޫސާމަނިކު ވަރުގަދަ ސުވާލުތަކެއް ކުރިމަތިކޮށްފި އެވެ.

ރީކޯ މޫސާ އެކްސްގައި ކުރި ޕޯސްޓެއްގައި ބުނީ، ވަކިވަކި ފަރާތްތަކުން ފުލުހަށް ހާޒިރުކޮށް، ހައްޔަރުކޮށް، އަނިޔާކޮށް އަދި ބިރުދެއްކުމުގެ ކުރިން ފަތުވާ ކޮމެޓީން ފުންކޮށް ވިސްނާލަންޖެހޭ ކަންތައްތަކެއް އެބަހުރި ކަމަށެވެ. އެގޮތުން، އެމްޑީޕީގައި ތިބީ ލާދީނީ ކާފަރުން ކަމަށް ބުނުމުގެ ހައްގު އެއްވެސް މީހަކަށް އެބައޮތްތޯ އޭނާ ވަނީ ސުވާލު އުފައްދައިފަ އެވެ.

"އެއަށް ޖަވާބެއް ދެއްވުމަށް ފަތުވާކޮމެޓީ ތައްޔާރަށް އޮތިއްޔާ ފުލުހުން ހާމަކޮށް ތަހުގީގު ކުރައްވާ" --- ރިކޯ މޫސާ އެކްސްގައި ހިއްސާކުރި ޕޯސްޓުގައި ބުންޏެވެ.

ރީކޯ މޫސާ މި މޭރުމުން ބުނެފައި މިވަނީ މި މަހުގެ ހަ ވަނަ ދުވަހު އެމްޑީޕީގެ ދަނޑިކޮށި ޖަގަހާގައި ބޭއްވި ބައްދަލުވުމެއްގައި އިލްމުވެރިންނަށް ނިސްބަތްކޮށްގެން އޭނާ ދެއްކި ވާހަކަތައް ކުށްވެރިކޮށް އިލްމުވެރިންގެ ގުޅުމުން ބަޔާނެއް ނެރެފައިވަނިކޮށެވެ. އިލްމުވެރިންގެ ގުޅުމުން ނެރެފައިވާ ބަޔާނުގައި ބުނީ، އިލްމުވެރިންނަށް ނިސްބަތްކޮށްގެން އޭނާ ދެއްކި ވާހަކަތަކަކީ ވަރަށް ނުރައްކާތެރި އަދި ހައްސާސީ މައްސަލައެއް ކަމުގައި ދެކޭ ކަމަށެވެ.

ރީކޯ މޫސާ ދައްކާފައިވާ ވާހަކައަކީ އޭގެ ސަބަބުން ރާއްޖޭގައި އިސްލާމްދީނާއި ދިވެހިންގެ ދީނީ ވަހުދަތު ނެގެހެއްޓުމަށްޓަކައި އެންމެ ގިނަ އަދި ބުރަ މަސައްކަތްތަކެއް ކުރައްވަމުންގެންދަވާ ދީނީ އިލްމުވެރިންނާ މެދު ނަފްރަތު އުފެއްދުމަށްޓަކައި ކޮށްފައިވާ ނޭއްގާނީ ދަށުދަރަޖައިގެ ނުރައްކާތެރި، ޒިންމާދާރުކަމެއް ނެތް އަމަލެއް ކަމުގައި ދެކޭ ކަމަށް އިލްމު ވެރިންގެ ގުޅުމުން ނެރެފައިވާ ބަޔާނުގައި ވަނީ ބުނެފަ އެވެ.