ސަލްމާން ރަސްގެފާނު މިސްކިތުގައި މިރޭ ހުޅުވާ އިސްލާމީ ކުތުބުހާނާއަކީ ދިރާސާކުރާ ފަރާތްތަކަށް މުހިންމު ތަނަކަށް ވާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެ އެވެ.
އިސްލާމިކް މިނިސްޓްރީގެ ވެބްސައިޓުގައި ބުނީ މިރެއަކީ ރާއްޖޭގެ އިސްލާމީ އިލްމީ ތާރީހުގައި ފާހަގަކޮށްލެވޭނެ ރެއަކަށް ވާނެ ކަމަށެވެ. އަދި އަހަރުތަކެއްގެ މެދުކެނޑުމަށް ފަހު ރާއްޖޭގެ އިސްލާމީ ކުތުބުހާނާ މިރޭ ހުޅުވުމަށް މިހާރު ފުރިހަމައަށް ތައްޔާރުވެފައިވާ ކަމަށް މިނިސްޓްރީން ބުންޏެވެ.
ސަލްމާން މިސްކިތުގެ ތިންވަނަ ފަންގިފިލާގައި ހުޅުވާ އިސްލާމީ ކުތުބުހާނާގައި 15،000 އަށް ވުރެ ފޮތް ހުންނާނެ އެވެ. އެ ކުތުބުޚާނާ ވާނީ އިސްލާމީ އިލްމު ހާސިލްކުރުމަށް ބޭނުންވާ އަދި ދިރާސާތައް ކުރުމަށް ބޭނުންވާ ފަރާތްތަކަށް ވަރަށް ބޭނުންތެރި، މުހިންމު ތަނަކަށް ކަމަށް މިނިސްޓްރީން ވެސް ބުންޏެވެ.
Advertisement
"އިންޝާﷲ މިރޭ އިސްލާމީ ކުތުބުހާނާ ހުޅުވާނެ، އިސްލާމީ ދިރާސާ ކުރާ ފަރާތްތަކަށް ވަރަށް ހިތްގައިމު މާހައުލަކަށްވެގެންދާނެ،" ޝަހީމް ވިދާޅުވި ކަމަށް މިނިސްޓްރީން ބުންޏެވެ.
ރާއްޖޭގެ ހުރިހާ އިސްލާމީ މަރުކަޒުތަކެއްގައި އިސްލާމީ ކުތުބުހާނާ ގާއިމްކުރުމަކީ ރައީސް ޑރ. މުހައްމަދު މުއިއްޒު ރިޔާސީ ވައުދުފުޅެކެވެ.
މާލެ އާއި ރަށްރަށުގެ އިސްލާމީ މަރުކަޒުތަކުގައި ހަދާ ލައިބްރަރީތަކަށް ބޭނުންވާ ފޮތްތައް އެކުވެރި ގައުމެެއްގެ ޔުނިވާސިޓީއަކުން ހަދިޔާކުރަން ހަމަޖެހިފައިވާ ކަމަށާއި އެ ޔުނިވާސިޓީން 60،000 ފޮތް ލިބޭނެ ކަމަށް ޝަހީމް ވިދާޅުވެފައިވެ އެވެ.
