އިޒްރޭލުގެ ބޮޑުވަޒީރު ބެންޖަމިން ނެތަންޔާހޫ އެމެރިކާއަށް ކުރައްވާ ދަތުރާ ގުޅިގެން، ފަލަސްތީނަށް ތާއީދުކުރާ ގިނަ ބަޔަކު ވޮޝިންގޓަން ޑީ.ސީ.ގައި ހުންނަ ވައިޓް ހައުސް ބޭރުގައި އިއްޔެ މުޒާހަރާކޮށްފިއެވެ. މި މުޒާހަރާގެ ބައިވެރިންވަނީ ނަތަންޔާހޫގެ ދަތުރު ކުށްވެރިކޮށް، އިޒްރޭލުން ޣައްޒާގައި ކުރިޔަށްދާ ހަނގުރާމަ ހުއްޓާލުމަށް ގޮވާލާފައެވެ.

މުޒާހަރާގެ ބައިވެރިން އެމެރިކާގެ ސަރުކާރަށް ގޮވައިލީ އިޒްރޭލަށް ހަތިޔާރު ދިނުން ހުއްޓާލުމަށެވެ. އަދި ނަތަންޔާހޫ ހައްޔަރުކުރުމަށް މުޅި ދުނިޔެއަށް ގޮވާލާފައި ވެއެވެ.

މިއީ އިޒްރޭލުގެ ބޮޑުވަޒީރު ނަތަންޔާހޫ ހަމަސްދުވަހުގެ ތެރޭގައި އެމެރިކާއަށް ކުރައްވާ ތިންވަނަ ދަތުރެވެ. އެމެރިކާގެ ރައީސް ޑޮނަލްޑް ޓްރަމްޕްއާ ނަތަންޔާހޫ ބައްދަލުކުރައްވަން ހަމަޖެހިފައިވަނީ މިއަދުގެ ވަގުތެއްގައެވެ.

އިއްޔެ ނޫސްވެރިންނާއި ވާހަކަ ދައްކަވަމުން ރައީސް ޓްރަމްޕް ވިދާޅުވީ، މި ހަފްތާ ތެރޭގައި ޣައްޒާގައި ހައްޔަރުކޮށްފައި ތިބި މީހުން ދޫކޮށްލުމާއި ފަލަސްތީނުގެ ހަމާސް ޖަމާއަތާއި ދެމެދު ހަނގުރާމަ ހުއްޓާލުމުގެ އެއްބަސްވުމަކަށް އާދެވިދާނެ ކަމަށް "ރަނގަޅު ފުރުސަތެއް" އެބައޮތް ކަމަށެވެ. ޓްރަމްޕް ވިދާޅުވީ، އިޒްރޭލާއެކު ގިނަ ކަންތައްތަކެއްގައި އެމެރިކާއިން މަސައްކަތް ކުރަމުންދާ ކަމަށާއި އޭގެ ތެރޭގައި ދާއިމީ އެއްބަސްވުމެއް އީރާނާއެކު ހެދުން ވެސް ހިމެނޭނެ ކަމަށެވެ.

މިއަދު ވެސް އެމެރިކާގައި ނަތަންޔާހޫ އާއި ދެކޮޅަށަ މުޒާހަރާ އެބަ ކުރެއެވެ. މިއަދުގެ މުޒާހަރާގެ ބައިވެރިންގެ ތެރޭގައި "އެމެރިކަން މުސްލިމްސް ފޯ ފަލަސްތީން (އޭއެމްޕީ)" ޖަމާއަތް ވެސް ހިމެނެއެވެ. މި ޖަމާއަތުގެ އިސްވެރިން ނޫސްވެރިންގެ ބައްދަލުވުމެއް ބާއްވައި، ނަތަންޔާހޫގެ ދަތުރު ކުށްވެރިކޮށް، ޣައްޒާގައި އިޒްރޭލުން ހިންގަމުންދާ ހަނގުރާމައަށް އެމެރިކާއިން ދޭ އެހީ ހުއްޓާލުމަށް ގޮވާލާފައި ވެއެވެ..

ބައިނަލްއަޤްވާމީ ކްރިމިނަލް ކޯޓު (އައި.ސީ.ސީ.) އިން މިދިޔަ ނޮވެމްބަރު މަހު ވަނީ ހަނގުރާމައިގެ ޖަރީމާތަކާއި އިންސާނިއްޔަތާއި ޚިލާފު ޖަރީމާތައް ޣައްޒާގައި ހިންގިކަމުގެ ތުހުމަތުގައި ނަތަންޔާހޫއާއި އޭނާގެ ކުރީގެ ދިފާއީ ވަޒީރު ހައްޔަރުކުރުމުގެ އަމުރު ނެރެފައެވެ. އަދި އިޒްރޭލާ ދެކޮޅަށް އައި.ސީ.ޖޭ. (ބައިނަލްއަޤްވާމީ ޢަދުލުގެ ކޯޓު) ގައި ވެސް ނަސްލު ނައްތާލުމުގެ ދަޢުވާއެއް ވަނީ އުފުލާފައެވެ.