ހދ. ހަނިމާދޫގައި ޤާއިމްކުރާ އިންޓަރނޭޝަނަލް އެއަރޕޯޓް ވިއްކާލަން އުޅޭކަމަށް ބުނެ ފަތުރަމުން އަންނަނީ ދޮގު ވާހަކަތަކެއް ކަމަށް އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

ވަޒީރު މިފަދައިން ވިދާޅުވީ އެ ވާހަކަތައް ދޮގުކުރައްވާ އެކްސްގައި ކުރެއްވި ޕޯސްޓެއްގައެވެ.

ވަޒީރުގެ ޕޯސްޓުގައި ވިދާޅުވެފައިވަނީ ހަނިމާދޫ އެއަރޕޯޓް ބޭރުގެ ފަރާތަކަށް ވިއްކާލަން ނުވަތަ ކުއްޔަށްދޭން އުޅޭ ކަމަށް ބުނެ ފަތުރަމުންދާ ވާހަކައަކީ ދޮގު ވާހަކައެއް ކަމަށެވެ. އަދި އެކަމާ ބެހޭ ގޮތުން ސިންގަޕޫރުގައި ބަޔަކާ ބައްދަލުކުރި ކަމަށް ބުނެވެސް ފަތުރަމުން އަންނަނީ ދޮގު ވާހަކައެއް ކަމަށް ވަޒީރު ވިދާޅުވިއެވެ.

ހަނިމާދޫ އެއަޕޯޓު ވިއްކާލަން އުޅޭކަމުގެ ވާހަކަ ދައްކަވާފައިވަނީ މިދިޔަ ބުރާސްފަތި ދުވަހުގެ ރޭ ޕީއެންއެފް އިން ބޭއްވި ޖަލްސާއެއްގައި ކުރީގެ ރައީސް އަބްދުﷲ ޔާމީން ޢަބްދުލްޤައްޔޫމް އެވެ. ޔާމީން ވަނީ އަދުގެ ސަރުކާރުން ހަނިމާދޫ އެއަރޕޯޓު އިންޑިއާގެ އަދާނީ ގްރޫޕަށް ވިއްކާލަން އުޅޭކަމަށް ތުހުމަތުކުރައްވާފައެވެ. އަދި އެކަމުގެ މަޝްވަރާތައް ސިންގަޕޫރުގައި ސަރުކާރުން ކުރި ކަމަށް ޔާމީން ވަނީ ވިދާޅުވެފައެވެ.

ހަނިމާދޫ އެއަރޕޯޓުގެ މަސައްކަތް އަދުގެ ސަރުކާރުން ހަލުވި ދުވެލީގައި ކުރަމުން އަންނަ އިރު، ޢިމާރާތްކުރުމާއި ގެދޮރުވެރިކަމާއި ބިނާރާބެހޭ ވަޒީރު ޑރ. ޢަބްދުﷲ މުއްޠަލިބް މި މަހުގެ އެއްވަނަ ދުވަހު ވިދާޅުވެފައިވަނީ އެ އެއަރޕޯޓުގެ މަސައްކަތް މި އަހަރުގެ ސެޕްޓެމްބަރު މަހުގެ ނިޔަލަށް އެއްކޮށް ނިންމާލެވޭނެ ކަމަށެވެ. އަދި ޕަސިންޖަރ ޓަރމިނަލްގެ މަސައްކަތުގެ %83 ނިމިފައިވާކަމަށާއި، އެއަރ ކޮންޓްރޯލް ޓަވަރ އަދި ހޭންގަރ އަދި ކާގޯ އިމާރަތުގެ %96 ނިމިފައިކަމަށް ވަޒީރު ވަނީ ވިދާޅުވެފައެވެ. އެއާއެކު މުޅި މަޝްރޫއުގެ %88 މިހާރު ނިމިފައިވާކަމަށް ވަޒީރު ވިދާޅުވިއެވެ.

ހަނިމާދޫ އެއަރޕޯޓު ތަރައްޤީކުރަމުން އަންނަނީ އެންމެ ބޮޑެތި ބޯޓު ފަހަރު ޖެއްސޭ ފެންވަރަށެވެ.