ވެލާނާ އިންޓަނޭޝަނަލް އެއާޕޯޓް ގެ ޑިއުޓީ ފްރީ މުވައްޒަފުން ޑިއުޓީ ގަޑީގައި މޯބައިލް ފޯނު ބޭނުންކުރުން މަނާކޮށްފައިވާ ކަމަށް ބުނެ ފަތުރަމުންދަނީ ކަނޑައެޅިގެން ޙަޤީޤަތާއި ޚިލާފު ދޮގު ވާހަކަތަކެކެވެ.

މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ އިތުބާރު ހުރި އެތެރޭގެ މަސްދަރުތަކުން ޚުލާޞާ އަށް މިއަދު ހެނދުނު ކަށަވަރުކޮށްދެއްވި ގޮތުގައި އެފަދަ އެއްވެސް ސިޔާސަތެއް މެނޭޖްމަންޓް ފެންވަރުގައި މުއާމަލާތްކޮށް، ފާސްކޮށް، ނުވަތަ މަޝްވަރާކޮށްފައެއް ނުވެއެވެ. "އެފަދަ އެއްވެސް ހުރަހެއް ތަންފީޒު ކުރަމުންދާކަން އަޅުގަނޑުމެންނަކަށް ނޭނގެ. މިކަމާއި ގުޅޭ އެއްވެސް އެތެރޭގެ މެމޯއެއް، ސާކިއުލާއެއް، ނޯޓިސްއެއް ވެސް ނެރެފައެއް ނުވޭ، އަދި ނެރޭކަށް މަސައްކަތެއް ވެސް ނުކުރޭ’. އޮފިޝަލް ސާފުކޮށްދެއްވި އެވެ.

ދޮގު ޚަބަރު ފެތުރި ފަރާތުން ރިޕޯޓްކުރި ގޮތުގައި ޑިއުޓީ ފްރީ އައުޓްލެޓްތަކުގައި މަސައްކަތްކުރާ މުވައްޒަފުންނަށް އަންގާފައި ވަނީ ޑިއުޓީ ގަޑީގައި އެ މީހުންގެ ފޯނު ލޮކަރުތަކުގައި ރައްކާކޮށް، ހަމައެކަނި ބްރޭކް ވަގުތުތަކުގައި ފޯނު ބޭނުން ކުރުމަށް އަންގާފައިވާ ކަމަށެވެ.

އެމްއޭސީއެލްގެ އޮފިޝަލު ވިދާޅުވީ އެ ކުންފުނިން އެފަދަ ފިޔަވަޅެއް ނާޅާ ކަމަށާއި އަދި މަޝްވަރާ ވެސް ކޮށްފައި ނުވާ ކަމަށެވެ.