އާސަންދައިގެ ދަށުން ލިބެންޖެހޭ ބޭސްތައް ބޭސްފިހާރަތަކުގައި ހުންނައިރު ވެސް، އާސަންދައިން ބޭސް ދޫނުކޮށް، ބޭސް ގަންނަންދާ ފަރާތްތަކަށް ވިއްކާ ނަމަ ހަރުކަށި ފިޔަވަޅު އަޅާނެ ކަމަށް އާސަންދަ ކުންފުނިން މިއަދު ބުނެފިއެވެ. މިކަން ހާމަކުރައްވާފައިވަނީ ރައްޔިތުންގެ މަޖިލީހުގެ އިޖުތިމާއީ ކޮމެޓީގައި މިއަދު ބޭއްވި ބައްދަލުވުމެއްގައެވެ.
ބޭހުގެ މައްސަލައާ ގުޅިގެން މެމްބަރެއްގެ ސުވާލަކަށް ޖަވާބު ދެއްވަމުން އާސަންދަ ކުންފުނީގެ މެނޭޖިން ޑިރެކްޓަރު އާމިނަތު ޒީނިޔާ ވިދާޅުވީ، ބޭހުގެ އަގުތަކަށް ސަރުކާރުން ގެނައި ބަދަލަށް ފަހު، އާސަންދައިން ބޭސް ހޯދަން ދިއުމުން ބޭސް ނުހުންނަ ކަމަށް ގިނަ ފާމަސީތަކުން ބުނަމުންދިޔަނަމަވެސް ހަމަ އެ ބޭސް، އެ ފާމަސީއަށް ގަންނަން ދިއުމުން ލިބެން ހުންނަ ކަމަށް ބުނެ ގިނަ ޝަކުވާތަކެއް ލިބެމުންދާ ކަމީ ބޮޑު ކަންބޮޑުވުމެއް ކަމަށެވެ.
ޒީނިޔާ ވިދާޅުވި ގޮތުގައި، ބޭސް ދޫކުރުމާ ގުޅޭގޮތުން ފާމަސީތަކުން އަމަލުކުރަންޖެހޭ ހާއްސަ އުސޫލެއް އެންސްޕާއިން ވަނީ ކަނޑައަޅާފައެވެ. ނަމަވެސް، ފާމަސީތަކުން މި އުސޫލާ ހިލާފުވާތީ، އާސަންދައިން ދަނީ އެ އުސޫލު ރިވިއުކޮށް، ބަދަލުކުރުމުގެ މަސައްކަތް ކުރަމުންނެވެ.
އެންސްޕާގެ އެހެން އޮފިޝަލަކު މި ބައްދަލުވުމުގައި ވިދާޅުވީ، މިފަދަ ފާހަގަކުރެވޭ ކަންތައްތަކާ ގުޅިގެން ފިޔަވަޅު އަޅަމުން އަންނަ ކަމަށާއި، އުސޫލާ ހިލާފުވާ ފާމަސީތައް ޖޫރިމަނާކޮށް، ހަރުކަށި ފިޔަވަޅު އެޅިގެންދާނެ ކަމަށެވެ. އަދި ހަމައެއާއެކު އާސަންދައިން ނުލިބޭ ބައެއް ބޭސްތައް ފާމަސީތަކުންވެސް ނުލިބިގެން އެންސްޕާ މެދުވެރިކޮށް ގެނެސް އާސަންދައިގެ ދަށުން ދޫކުރާ ކަމަށާއި ރާއްޖެއިން ބޭރުން އެގޮތަށް ބޭހެއް ގެންނައިރު ބައެއް ފަހަރު ދެތިން މަސް ނަގާ ކަމަށްވެސް އެ އޮފިޝަލު ވަނީ ވިދާޅުވެފައެވެ.
ޒީނިޔާ އިތުރަށް ވިދާޅުވީ، "އެޕްރޫވް ޑްރަގް ލިސްޓުން އަޅުގަނޑުމެން އުނިކޮށްލާނީ ސްކީމްގެ ގަވައިދުތެރެއިން ލިބިނުދެވޭ ހިދުމަތްތަކަށް ފޯރުވާ ހުރިހާ ބޭހެއް، އުނިކޮށްފައި ދެން ހުރި ހުރިހާ ބޭހަކީ ހަމަ އާސަންދަ ސްކީމުގެ ތެރެއިން ކަވާރ ކުރެވޭ ބޭސްތައް. މިސާލަކަށް އޭޑީއެލްގައި ނެތީސް ޑޮކްޓަރު ލިޔެދެއްވައިފިއްޔާ ދެން އަޅުގަނޑުމެން އޭތި އާސަންދަ ސްކީމްގެ ތެރެޔެއިން ދުލެއް ނުކުރެވޭނެ."
ބޭސްތަކަށް އާސަންދައިން ކަނޑައަޅާފައިވާ އަގު ކުޑަކުރުމަށް ފަހު، ރައްޔިތުންނަށް ފާމަސީތަކުން ބޭސް ލިބުމުގައި ވަރަށް ބޮޑެތި ގޮންޖެހުންތައް ދިމާވެފައިވެއެވެ. މި ގޮންޖެހުންތަކުގެ ތެރޭގައި ބައެއް ބޭސްތައް ރާއްޖެ ގެނައުން ހުއްޓާލުމާއި، ލިބެން ހުރި ބޭސްތައް ވެސް އެކި ސަބަބުތައް ދައްކައި އާސަންދައިން ދޫކުރުން އަމިއްލަ ބޭސް ފިހާރަތަކުން ހުއްޓާލުން ހިމެނެއެވެ.
