ވެލާނާ އިންޓަނޭޝަނަލް އެއާޕޯޓުގައި (ވީއައިއޭ) ތަރައްޤީކުރަމުންދާ އާ ޓަރމިނަލާއި ގުޅިގެން އެއަރޕޯޓުގެ ޓްރެފިކަށް އަންނަ ބަދަލުތަކަށް ސަމާލުވުމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން އިލްތިމާސްކޮށްފިއެވެ. ވީއައިއޭގެ އައު ޓަރމިނަލް ހުޅުވުމަށް ހަމަޖެހިފައިވަނީ ރާއްޖޭގެ ފަޚުރުވެރި 60 ވަނަ މިނިވަން ދުވަހުގެ މުނާސަބާގައި، އަންނަ މަހުގެ 26 ވަނަ ދުވަހުއެވެ.
މީޑިއާތަކަށް މަޢުލޫމާތު ދެއްވަމުން އެމްއޭސީއެލުން ބުނީ، އަންނަ މަހު ޓަރމިނަލް ހުޅުވުމަށް ވާންޖެހޭ އެންމެ ފަހުގެ ތައްޔާރީތައް މިހާރު ވަމުންދާ ކަމަށެވެ. އެހެންކަމުން އެއަރޕޯޓުގެ ޓްރެފިކް ރޫޓުތަކަށް ބަދަލު އައުމަކީ އެކަށީގެންވާކަމެއް ކަމަށާއި، މި ބަދަލުތަކަށް ސަމާލުވެ، ސެކިއުރިޓީ މުވައްޒަފުންގެ އިރުޝާދުތަކާ އެއްގޮތަށް ޢަމަލުކުރުމަށް އެމްއޭސީއެލްއިން ވަނީ ހުރިހާ ފަރާތްތަކަށް އިލްތިމާސްކޮށްފައެވެ.
އާ ޓަރމިނަލާ ގުޅިގެން އެމްއޭސީއެލުން ވަނީ އެއަރޕޯޓަށް ވަދެވޭ ބައެއް މަގުތައް މިހާރުވެސް ބަންދުކޮށްފައެވެ. އަދި ވެހިކަލްތައް މިހާރު ހުރި ޓަރމިނަލަށް ދިއުމުގައި ބޭނުންކުރަންޖެހޭ ރޫޓަށްވެސް މިހާރު ވަނީ ބަދަލުތަކެއް ގެނެސްފައެވެ. މި ބަދަލުތައް އެނގޭނެހެން މަގުމަތީ ނިޝާންތައް ވަނީ ހަރުކޮށްފައި ކަމަށް އެމްއޭސީއެލުން މަޢުލޫމާތު ދިނެވެ.
Advertisement
ވީއައިއޭގެ އައު ޓަރމިނަލާއެކު އެއަރޕޯޓުގެ ޓްރެފިކް ވަރަށް ބޮޑަށް އިތުރުވާނެކަން ފާހަގަކޮށްލެވެއެވެ. މި އައު ޓަރމިނަލާއެކު އަހަރަކު 7 މިލިޔަން މީހުންނަށް ޚިދުމަތް ދެވޭނެއިރު، އެއާއި ގުޅިގެން ރާއްޖެއަށް ޒިޔާރަތްކުރާ މީހުންގެ އަދަދު ވަރަށް ބޮޑަށް އިތުރުވާނެކަން ސަރުކާރުން ފާހަގަކުރައްވައެވެ. މިއީ ރާއްޖޭގެ އިޤްތިޞާދަށް ވަރަށް ބޮޑު ކުރިއެރުމެއް ގެނެސްދޭނެ މަޝްރޫޢެއް ކަމަށް ސަރުކާރުން ލަފާކުރައްވައެވެ.
