ރ. ފައިނުގައި މިދިޔަ ބުރާސްފަތި ދުވަހުގެ ރޭ ހިނގި އެކްސިޑެންޓުގައި ސީރިއަސް އަނިޔާތަކެއްވި ޓީޗަރަށް އަދިވެސް ފަރުވާދެމުން އަންނަނީ ވެންޓިލޭޓަރުގައި ކަމަށް އައިޖީއެމްއެޗުން ބުނެފިއެވެ.
އައިޖީއެމްއެޗުން ބުނީ މި އެކްސިޑެންޓާ ގުޅިގެން އެ ހޮސްޕިޓަލުގައި ފަރުވާ ދިނުމަށް މާލެ ގެނެސްފައިވަނީ 49 އަހަރުގެ ފިރިހެނަކާއި 14 އަހަރުގެ ކުއްޖަކާއި 16 އަހަރުގެ ކުއްޖެއް ކަމަށެވެ. އޭގެ ތެރެއިން ޓީޗަރަށް ލިބުނު އަނިޔާތަކަށް އަދިވެސް ފަރުވާދެމުން އަންނަނީ ވެންޓިލޭޓަރުގައި ކަމަށް އައިޖީއެމްއެޗުން ބުންޏެވެ.
އައިޖީއެމްއެޗުން ބުނީ 14 އަހަރާއި 16 އަހަރުގެ ކުއްޖާއަށްވެސް ސީރިއަސް އަނިޔާތަކެއް ލިބުނު ކަމަށާއި، އެ ދެ ކުދިންނަށް ވެސް ވެންޓިލޭޓަރުގައި ފަރުވާ ދިން ކަމަށެވެ. އަދި މިހާރު އެ ދެކުދިން ވެންޓިލޭޓަރުން ނަގާފައިވީ ނަމަވެސް އަދިވެސް ފަރުވާދެމުން އަންނަނީ އައިސީޔޫގައި ކަމަށް އައިޖީއެމްއެޗުން ބުންޏެވެ.
މި އެކްސިޑެންޓުގައި އަނިޔާވީ ސްކޫލު ޕްރިންސިޕަލާއި ޓީޗަރަކާއި ދެ ކުއްޖަކަށެވެ.
މި އެކްސިޑެންޓު ހިނގާފައިވަނީ މި އަހަރު އޯ ލެވެލް ނިންމި ދަރިވަރަކާއި ގްރޭޑު 9 ގައި ކިޔަވަމުން އަންނަ ދަރިވަރަކު ދުއްވި ސައިކަލެއް ޓީޗަރާއި ޕްރިންސިޕަލްގައިގައި ޖެހިގެން ކަމަށް ފުލުހުން ބުނެފައިވެއެވެ.
