އީރާނާއި ދެކޮޅަށް މިހާރު ހިންގަމުންގެންދާ ކަންކަމާއި ދިވެހިރާއްޖެއިން ދެކޮޅު ހަދައި، އިޒްރޭލުން އީރާނުގެ ބިންތަކަށް ދެމުންދާ ހަމަލާތަކަކީ ސަރަހައްދީ ހަމަޖެހުމާއި ސުލްހައަށް ދެވުނު ހަމަލާތަކެއްގެ ގޮތުގައި ދިވެހިރާއްޖެއިން ސިފަކޮށްފި އެވެ. މިކަން ހާމަކުރެއްވީ އޯގަނައިޒޭޝަން ފޯ އިސްލާމިކް ކޯޕަރޭޝަން (އޯއައިސީ) ގެ 51 ވަނަ ސެޝަންގައި ރާއްޖެ ތަމްސީލު ކުރައްވަމުން ފޮރިން މިނިސްޓަރު އަބްދުﷲ ހަލީލް އެވެ.

މިނިސްޓަރު ހަލީލް ވިދާޅުވީ، ދުނިޔޭގެ އޮއިވަރަށް އަންނަމުންދާ ބަދަލުތަކާއެކު އޯއައިސީގެ މެންބަރު ގައުމުތަކުގެ މެދުގައި، އަދި އިސްލާމީ އުންމަތުގެ ތެރޭގައި އެއްބައިވަންތަކަން ގާއިމުކުރުމަށްޓަކައި މުހިންމު މަސައްކަތްތަކެއް ކުރަންޖެހިފައިވާ ކަމަށެވެ.

ވަކިން ހާއްސަކޮށް މެދުކެނޑުމެއްނެތި އިޒްރޭލުން ޣައްޒާ އަދި ފަލަސްތީނުގެ ރައްޔިތުންނާއި ދެކޮޅަށް ހިންގަމުންދާ އަނިޔާވެރި އަމަލުތައް ކުށްވެރިކޮށް އެކަމާމެދު ދިވެހި ސަރުކާރުން ވަނީ ކަންބޮޑުވުން ފާޅުކުރައްވާފަ އެވެ. މީގެ އިތުރުން، އިޒްރޭލުން އީރާނަށް ދޭންފެށި ހަމަލާތައް ހަރުކަށި އިބާރާތުން ކުށްވެރިކުރައްވައި، ހަމަލާތައް ވަގުތުން ހުއްޓާލުމަށް މި ބައްދަލުވުމުގައި ދިވެހި ސަރުކާރުގެ ފަރާތުން މިނިސްޓަރު ވަނީ ގޮވާލައްވާފަ އެވެ.

މިނިސްޓަރު ވިދާޅުވި ގޮތުގައި ރާއްޖެއިން އަބަދުވެސް ދެމި އޮންނާނީ ފަލަސްތީނުގެ ހައްގުގައި ވަކާލާތުކުރުމުގަ އެވެ. ފަލަސްތީނަކީ މިނިވަން އަދި އިސްތިގްލާލީ ގައުމެއްގެ ގޮތުގައި ބަލައިގަތުމަކީ ސުލްހައާއި އިންސާފު ގާއިމްކުރުމަށް ވަރަށް މުހިންމު ކަމެއް ކަމަށް ވެސް މިނިސްޓަރު ފާހަގަކުރެއްވި އެވެ.

މި ބައްދަލުވުމުގައި ތަޤުރީރުކުރައްވަމުން މިނިސްޓަރު ވަނީ ސައުދީ އަރަބިއްޔާ ގުޅިފައިވާ އިއްތިހާދުން އިސްނަގައިގެން އެކުލަވާލާފައިވާ "ޓޫ ސްޓޭޓް ސޮލިއުޝަން" ތަންފީޒުކުރުމަށާއި، ޣައްޒާ އަލުން އާރާސްތުކޮށް ރައްޔިތުންނަށް އަލުން އުއްމީދާއި ދިރުން ގެނުވައިދޭ "ގާޒާ ރިކޮންސްޓްރަކްޝަން ޕްލޭން" އަށް އެހީތެރިވުމަށް ރާއްޖެއިން ތައްޔާރަށް އޮތްކަން ހާމަކުރައްވާފަ އެވެ.

އޯއައިސީގައި 57 މެންބަރުން ހިމެނޭއިރު، ރާއްޖެއިން އެ ޖަމްއިއްޔާ އާއި ގުޅިފައިވަނީ 1976 ވަނަ އަހަރު އެވެ. އޯއައިސީއާއި ރާއްޖޭގެ ގުޅުން އިތުރަށް ވަރުގަދަ ކުރަން މިއަހަރުގެ އޭޕްރީލް މަހު، ސައުދީ އަރަބިއްޔާއަށް ރާއްޖެއިން ކަނޑައަޅުއްވާފައިވާ ސަފީރު އަހުމަދު ސަރީރާއި، އޯއައިސީގެ ސެކްރެޓަރީ ޖެނެރަލް ހުސެއިން އިބްރާހީމް ތާހާ އާއި އެކުވެސް ވަނީ މަޝްވަރާކޮށްފަ އެވެ.