މަޝްހޫރު ޕޮޕް ސްޓާ ޑުއާ ލިޕާ އާއި އިނގިރޭސި އެކްޓަރު ކެލަމް ޓާނާ އެންގޭޖްވެއްޖެ ކަމަށް ރަސްމީކޮށް އިޢުލާނުކޮށްފިއެވެ. މި ޚަބަރު ހާމަކޮށްފައިވަނީ އިނގިރޭސި މަޖައްލާ ވޯގަށް ދިން އިންޓަވިއުއެއްގައެވެ.
އުމުރުން 29 އަހަރުގެ އަލްބޭނިއާއަށް ނިސްބަތްވާ ލަވަކިޔުންތެރިޔާ ޑުއާ ލިޕާ ވަނީ މި އެންގޭޖްމަންޓަކީ "ވަރަށް އެކްސައިޓިންގް" ކަމެއްކަމަށް ބުނެފައެވެ. އުމުރުން 35 އަހަރުގެ ކެލަމް ޓާނާ ވަނީ ޑުއާގެ ގާތް ރައްޓެހިންނާއި އޭނާގެ ކޮއްކޮ ރީނާ ލިޕާއާ ގުޅިގެން އެންގޭޖްމަންޓް އަނގޮޓި ޑިޒައިންކޮށްފައެވެ. މި އަނގޮޓިއަކީ ޑުއާގެ ޝަޚްޞިއްޔަތާއި ސްޓައިލް ދައްކުވައިދޭ އަނގޮޓިއެއްކަން ކެލަމް ވަނީ ކަށަވަރުކޮށްދީފައެވެ.
މި ދެލޯބިވެރިންގެ ގުޅުން ފެށިގެން އައީ 2024 ވަނަ އަހަރުގެ ކުރީކޮޅުގައެވެ. އެންމެ ފުރަތަމަ ދެމީހުން އެކުގައި ފެނިގެން ދިޔައީ އެޕަލް ޓީވީ ޕްލަސްގެ "މާސްޓާސް އޮފް ދަ އެއާ" ގެ ޕްރިމިއާއަށް ބޭއްވުނު އަފްޓަރ ޕާޓީގައެވެ. އަދި އެ އަހަރުގެ ޖުލައި މަހު އެ ދެމީހުންގެ ގުޅުން އިންސްޓަގްރާމްގައި ރަސްމީކޮށް އިޢުލާނުކުރިއެވެ.
މިވަގުތު މި ދެތަރިން ވެސް ދަނީ އެމީހުންގެ ކެރިއަރއަށް އިސްކަންދެމުންނެވެ. ޑުއާ ލިޕާ މިހާރު ދަނީ އޭނާގެ "ރެޑިކަލް އޮޕްޓިމިޒަމް" ޓުއަރ ކުރިއަށް ގެންދަމުންނެވެ. އަދި ކެލަމް ޓާނާ އަންނަނީ އައު ޕްރޮޖެކްޓްތަކެއް ޝޫޓްކުރަމުންނެވެ.
މި ދެތަރިން އެންގޭޖްވި ޚަބަރާއެކު، ގިނަ ފޭނުން ވަނީ މީސްމީޑިއާ ޕްލެޓްފޯމްތަކުގައި އެ ދެމީހުންނަށް މަރުޙަބާ ކިޔައި، އުފާވެރި ޝުޢޫރުތައް ފާޅުކޮށްފައެވެ. ނަމަވެސް، މި ދެ ލޯބިވެރިން ވަނީ މިވަގުތު ކައިވެނީގެ ޕްލޭންތައް ސިއްރުކޮށްފައެވެ.
