ރާއްޖޭގެ ފުޓުބޯޅަ އާއި ބެޑްމިންޓަން އަޑިއެޅީ އަމިއްލަ މަސްލަޙަތު އިސްކޮށް، ހިންގުން ދޯދިޔާވުމުން ކަމަށާއި ކުޅިވަރު އެސޯސިއޭޝަނެއްގެ ހިންގުން ހުއްޓުމަކަށް އައިސް، ނޯމަލައިޒްކޮށް ސަސްޕެންޑް ކުރުންފަދަ ކަންކަމުގެ ހުރިހާ ދެރައެއްވެސް ލިބޭނީ ދިވެހި ކުޅިވަރަށާއި އެ ކުޅިވަރެއް ކުޅޭ ކުޅުންތެރިންނަށް ކަމަށް މޯލްޑިވްސް އޮލިމްޕިކް ކޮމިޓީ (އެމްއޯސީ) ގެ ރައީސް މުޙައްމަދު ޢަބްދުއްސައްތާރު (ޗަމްޕީ) ވިދާޅުވެއްޖެއެވެ.

އިއްޔެ ހ. މީރުމާގައި ބޭއްވުނު އެމްއޯސީގެ އައު ހިންގާ ކޮމިޓީ އެކުލަވާލުމުގެ އިންތިޚާބަށްފަހު، ދެވަނަ ދައުރަކަށް ރައީސްކަމާއި ހަވާލުވުމަށްފަހު އެސޯސިއޭޝަންތަކުގެ ވެރިންނާ މުޚާޠަބުކުރައްވަމުން ޗެމްޕީ ވިދާޅުވީ ކުޅިވަރު އެސޯސިއޭޝަންތައް ހިންގުމުގައި ދެފުށް ފެންނަ އަދި ޖަވާބުދާރީވާނެ ގޮތްތައް އިސްކުރަންޖެހޭ ކަމަށެވެ. ޗަމްޕީ ފާހަގަކުރެއްވި ގޮތުގައި، ރާއްޖޭގެ އެންމެ މަޤްބޫލު ކުޅިވަރުކަމަށްވާ ފުޓްބޯޅައާއި، ފަހުގެ ތާރީޚުގައި ރާއްޖެއަށް އެންމެ ގިނަ މެޑަލް ހޯދައިދިން ކުޅިވަރުކަމަށްވާ ބެޑްމިންޓަންގެ ބެލެނިވެރި އެސޯސިއޭޝަންތަކަށް މިހާރު ދިމާވެފައިވާ ހާލަތާމެދު އެމްއޯސީ ކަންބޮޑުވެއެވެ. ފުޓްބޯޅަ އެސޯސިއޭޝަން ފީފާއިން ނޯމަލައިޒްކޮށްފައިވާއިރު، ބެޑްމިންޓަން އެސޯސިއޭޝަން ވޯލްޑް ބެޑްމިންޓަން ފެޑެރޭޝަން (ބީޑަބްލިއުއެފް) އިން ވަނީ ސަސްޕެންޑް ކޮށްފައެވެ.

"މިފަދަ ހާލަތްތަކަށް އެސޯސިއޭޝަންތައް ދަނީ ހިންގުން ހަރުދަނާކުރުމުގައި ކުރަންޖެހޭ މުހިންމު ބައެއް ކަންކަން ދޫކޮށްލެވުމުން. މިސާލަކަށް ދަންނަވާނަމަ ފައިސާގެ ކަންކަން ހާމަކަން ބޮޑު ގޮތެއްގައި ގެންދިއުމާއި، މާލީ ހިސާބުތައް އެންމެ ފުރިހަމަ ގޮތުގައި ބެލެހެއްޓުމާއި، އޮޑިޓް ކުރުންފަދަ ކަންކަމަށް އިސްކަން ނުދެވުމުން," ޗެމްޕީ ވިދާޅުވިއެވެ.

އެމްއޯސީގެ ރައީސް އިތުރަށް ވިދާޅުވީ، އެސޯސިއޭޝަންތަކުގެ ހިންގާ ގަވާއިދު ހަރުދަނާކޮށް، ޖަވާބުދާރީވެވޭ ގޮތަށް، އަދި އެ ކުޅިވަރަކަށް އެންމެ ފައިދާހުރި ގޮތަށް ކަންކަން ބައްޓަންކުރެވޭނެ ގޮތަށް އިންތިޒާމުތައް ހަމަޖައްސަންޖެހޭ ކަމަށެވެ.

"އެއްވެސް މީހެއްގެ އަމިއްލަ މަސްލަހަތު ކުޅިވަރުގައި އިސްކޮށްފިނަމަ އޭގެ އެދެވޭ ނަތީޖާއަށްވުރެ ނިކުތުން ގާތީ ނޭދެވޭ ނަތީޖާ," ޗެމްޕީ ވިދާޅުވިއެވެ.