ބިމުއަޑީގެ ހަނގުރާމައަކަށް އެމެރިކާއިން ރޮބޮޓު ކުއްތާތައް ތަމްރީނުކުރަނީ

އުތުރު ކޮރެއާގެ ބިމުއަޑީ ޓަނަލް ވިއުގައާއި ދެކޮޅަށް ހަނގުރާމަކުރުމަށް ދެކުނު ކޮރެއާ އާއި އެމެރިކާގެ ސިފައިން ގުޅިގެން ތަމްރީނު ފަށައިފިއެވެ.

މަސްދަރުތައް ބުނާ ގޮތުގައި "ފްރީޑަމް ޝީލްޑް" ގެ ނަމުގައި އަހަރަކު އެއްފަހަރު ބާއްވާ މި ތަމްރީނު ފެށިފައިވަނީ މިއަދު، ސޯލުގެ އުތުރުން 30 ކިލޯމީޓަރު ދުރުގައިވާ ޕާޖޫގައެވެ.

މި ހަތަރު ދުވަހުގެ އޮޕަރޭޝަނުގައި 370 އެއްހާ ސިފައިން ބައިވެރިވާއިރު، ޑްރޯންތަކާއި ހަތަރު ފައި ޖަހާފައިވާ ރޮބޮޓު ކުއްތާތައް ބޭނުންކުރެއެވެ. މި ރޮބޮޓު ކުއްތާތައް ބޭނުންކުރަނީ ޓަނަލްތަކުގެ ދޮރާށިތައް ދެނެގަތުމަށާއި، ރިމޯޓުން ކޮންޓްރޯލްކުރެވޭ ގޮއްވާލެވޭ ތަކެތި ބޭނުންކޮށްގެން އެ ދޮރާށިތައް ގޮއްވާލުމަށާއި، ވައި ދައުރުކުރާ ނިޒާމުތައް ހަލާކުކުރުމަށެވެ. މި ކުއްތާތައް ބޭނުންކުރާ މަޤްޞަދަކީ އިންސާނުންގެ ފުރާނައަށް ގެއްލުންވާ މިންވަރު މަދުކުރުމާއި ވަގުތުން ވަގުތަށް މަޢުލޫމާތު އެއްކުރުމެވެ.

^{ދެކުނު ކޮރެއާ އާއި އެމެރިކާ ގުޅިގެން ހިންގާ ބިމުއަޑީގެ ތަމްރީނުތަކުގައި ރޮބޮޓިކް ކުއްތާ އެއް ބޭނުންކުރަނީ.}

އުތުރު ކޮރެއާއިގައި ވަރަށް އާދަޔާ ޚިލާފު ބޮޑު ޓަނަލް ވިއުގައެއް ކޮނެފައި ވެއެވެ. މީގެ ތެރެއިން ބައެއް ޓަނަލްތަކުގެ ދިގު މިނުގައި 50 ކިލޯމީޓަރު ހުރެއެވެ. މި ޓަނަލްތަކަކީ އެ ޤައުމުން އެހެން ޤައުމަކަށް އަރައިގަތުމަށް ބޭނުންކުރެވިދާނެ މަގުތަކަކަށް ވުމުގެ އިތުރުން، ސިފައިންގެ ހަތިޔާރާއި އެހެނިހެން ތަކެތި ރައްކާކުރުމަށް ބޭނުންކުރެވިދާނެ ތަންތަން ކަމަށްނދެކުނު ކޮރެއާއިން ބުނެއެވެ.

މި ތަމްރީނުތަކާއި ގުޅިގެން އުތުރު ކޮރެއާއިން ވަނީ ކްރޫޒް މިސައިލްތަކެއް ތަޖުރިބާކޮށް، އިންޒާރުތަކެއް ވެސް ދީފައެވެ.