އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގެ ވެއިޓް ލިސްޓު ކުޑަކުރުމަށްޓަކައި އިތުރު ސްޕެޝަލިޓީތަކުގެ އައުޓް-ޕޭޝަންޓް ޑިޕާޓްމަންޓް (އޯޕީޑީ) ގެ ޚިދުމަތް އިތުރުކޮށްފިއެވެ.
"ރައްޔިތުންނާއެކު" ޕޮޑްކާސްޓުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވި ގޮތުގައި، އެންމެ ގިނަ މީހުން ދައްކަން ބޭނުންވާ ސްޕެޝަލިސްޓު އޭރިއާތަކުގެ ކިއު ކުޑަކުރުމުގެ މަސައްކަތް ވަނީ ފަށާފައެވެ. މި ގޮތުން، ރޭގަނޑު އައުޓް-ޕޭޝަންޓު ކޮންސަލްޓޭޝަން ފެށުމާއި ގުޅިގެން އެންމެ ގިނަ މީހުން ފަރުވާ ހޯދާ ބަލިތަކުގެ ކިއު ކުޑަކުރެވޭނެ ކަމަށް ރައީސް ވިދާޅުވިއެވެ.
އައިޖީއެމްއެޗްގެ ސީއީއޯ އިބްރާހިމް ހަލީމް މަޢުލޫމާތު ދެއްވާފައިވާ ގޮތުގައި، ފަސް ޑިޕާޓްމަންޓަކުން ރޭގަނޑު އޯޕީޑީ ފަށާފައި ވެއެވެ. މި ޑިޕާޓްމަންޓްތަކުގެ ތެރޭގައި ދަތުގެ ފަރުވާ، ޑައިޓާ ގުޅޭ ޑިޕާޓްމަންޓް، އެންޑޮކްރޮނޮލޮޖީ، ނާރުގެ ބަލިތައް އަދި ކަރުންމަތީގެ އޯޕީޑީ ހިމެނެއެވެ. ރޭގަނޑު ޝިފްޓުގެ މަސައްކަތް ކުރިއަށްދާނީ ރޭގަނޑު 8:00 އިން 11:00 އަށެވެ.
Advertisement
މީގެ އިތުރުން، އެޑްމިޓުކޮށްފައިވާ މީހުންނަށް ފަސޭހައިން ބޭސް ލިބޭނެ ގޮތްތައް ވެސް ވަނީ ހަމަޖައްސާފައެވެ. ކުރިން އެޑްމިޓުކޮށްފައިވާ މީހުންނަށް ބޭސް ހޯދަން ޖެހެނީ އާއިލާތަކުން ނަމަވެސް، އަލަށް އަމަލުކުރަން ފަށާފައިވާ ގޮތުން އިން-ޕޭޝަންޓުންނަށް ބޭސް ނަގައިދޭނީ ހޮސްޕިޓަލުންނެވެ.
މިދިޔަ އޮކްޓޯބަރު މަހު ވެސް އައިޖީއެމްއެޗްގެ ތިން ޑިޕާޓްމަންޓެއްގެ ޝިފްޓް ޑިއުޓީ އިތުރުކުރިއެވެ. އެއީ އަންހެނުންގެ ބަލިތަކާއި ނަފްސާނީ ބަލިތައް އަދި ދަތުގެ މައްސަލަތަކަށް ފަރުވާ ދޭ ޑިޕާޓްމަންޓެވެ. ނަމަވެސް، އެ ޑިޕާޓްމަންޓުތަކުގެ ޝިފްޓު އިތުރުކުރެވިފައިވަނީ ރޭގަނޑު 8:00 އާއި ހަމަޔަށެވެ.
