ރާއްޖޭގެ ޞިއްޙީ ދާއިރާ ހަރުދަނާކުރުމަށްޓަކައި ސަރުކާރުން ގިނަ ޢަދަދެއްގެ މަޝްރޫޢުތަކެއް ފަށައިފިއެވެ. ރައީސުލްޖުމްހޫރިއްޔާގެ ވަޢުދުފުޅާއެކު ރަށްރަށުގެ ޞިއްޙީ ޙާލަތު ރަނގަޅުކުރުމަށް މިވަގުތަށް 18 މަޝްރޫޢެއްގެ އެއްބަސްވުންތަކުގައި ސޮއިކޮށްފައިވާއިރު އަދިވެސް ވަރަށް ބައިވަރު ޕްރޮޖެކްޓުތައް ރޭވިފައި ވެއެވެ.
މިހާރު ޙަވާލުކުރި 18 ޕްރޮޖެކްޓުގެ ތެރެއިން އެންމެ ބޮޑު މަޝްރޫޢަކީ ރ. މީދޫގައި އަލަށް އިމާރާތްކުރުމަށް ހަމަޖެއްސި ހޮސްޕިޓަލް މަޝްރޫޢެވެ. މި މަޝްރޫޢުގެ އަގަކީ 108,994,457.93 ރުފިޔާ ކަމަށްވާއިރު، މި މަސައްކަތް ޙަވާލުކޮށްފައިވަނީ ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އާއެވެ.
މި މަޝްރޫޢުތަކަކީ ރާއްޖޭގެ ޞިއްޙީ ޚިދުމަތްތައް ލާމަރުކަޒީކޮށް، ރައްޔިތުން ބޭސްފަރުވާއަށް މާލެ އައުމުގެ ބަދަލުގައި އަތޮޅުތަކުން ޚިދުމަތް ލިބޭނެ މަގު ތަނަވަސްކޮށްދިނުމަށް ރައީސުލްޖުމްހޫރިއްޔާ ޑރ. މުޢިއްޒު ކުރައްވާ މަސައްކަތްތަކެކެވެ. މިގޮތުން ހދ. ހަނިމާދޫ، އދ. މާމިގިލި އަދި ކ. ގާފަރު ފަދަ ރަށްރަށުގައި ހޮސްޕިޓަލްތަކާއި ޞިއްޙީ މަރުކަޒުތައް ޤާއިމްކުރުމަށް ވަނީ ރޭވިފައެވެ.
މި މަސައްކަތުގެތެރެއިން 9 ރަށެއް ފެނަކައާއި ޙަވާލުކުރިއިރު އެއީ ޖުމްލަ 127,701,460.78 ގެ ޕްރޮޖެކްޓް ތަކެވެ.
ފެނަކައިގެ އިތުރުން ދެން ޕްރޮޖެކްޓުތައް ޙަވާލުކުރީ ފަސްރަށެއްގެ ސިއްހީ ހިދުމަތްދޭ ތަންތަން އިމާރާތްކުރަން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާއި، ހަތަރު ރަށެއްގެ ސިއްހީ ހިދުމަތްދޭ ތަންތަނުގެ އިމާރާތްކުރަން ރޯޑް ޑިވެލޮޕްމެންޓް ކޯޕަރޭޝަން (އާރުޑީސީ) އާއެވެ.
މީގެ އިތުރުން، ކުވެއިތު ފަންޑުން 9.8 މިލިއަން ޑޮލަރު (151 މިލިއަން ރުފިޔާ) ގެ ލޯނެއް ހޯދައި، ކުދި ރަށްރަށުގައި ހޮސްޕިޓަލްތައް އިމާރާތްކުރުމަށާއި ޞިއްޙީ ދާއިރާއަށް ބޭނުންވާ ވަޞީލަތްތައް ހޯދުމަށް ސަރުކާރުން ވަނީ މަސައްކަތް ފަށާފައެވެ.
ޔުނިސެފާއި ގުޅިގެން ސަރުކާރުން ފަށާފައިވާ ޕްރައިމަރީ ހެލްތް ކެއަރ އިންވެސްޓްމަންޓް ކޭސްގެ ދަށުން، 2030 ވަނަ އަހަރާއި ހަމައަށް ރާއްޖޭގެ ހުރިހާ ރައްޔިތުންނަށް ފެންވަރު ރަނގަޅު ޞިއްޙީ ޚިދުމަތް ފޯރުކޮށްދިނުމަކީ ރައީސް ޑރ. މުޢިއްޒުގެ އަމާޒެކެވެ.
