ޒަމާނީ ވަސީލަތްތަކާއެކު ހުޅުމާލެ ހޮސްޕިޓަލުގައި އަލަށް ޤާއިމުކުރި އިމަރޖެންސީ ރޫމް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުޅުއްވައިދެއްވައިފިއެވެ.

ހުޅުމާލެ ހޮސްޕިޓަލުގެ އައު އިމަރޖެންސީ ރޫމް ރައީސުލްޖުމްހޫރިއްޔާ ހުޅުއްވައިދެއްވީ އެކަމަށްޓަކައި މިއަދު ހަވީރު ހުޅުމާލޭ ހޮސްޕިޓަލުގެ ކަނބިލި ބިލްޑިންގގައި ބޭއްވި ޚާއްސަ ރަސްމިއްޔާތެއްގައެވެ. މި ރަސްމިއސްމިއްޔާތުގައި ޞިއްޙީ ވަޒީރު ޢަބްދުﷲ ނާޡިމް އިބްރާހީމާއި، ހުޅުމާލެ ހޮސްޕިޓަލުގެ ހިިންގުން ޙަވާލުކޮށްފައިވާ މާލޭ ގްރޫޕް އޮފް ހޮސްޕިޓަލްސްގެ އިސްވެރިން ބައިވެރިވެ ވަޑައިގެންނެވިއެވެ.

ހުޅުމާލޭގެ އާބާދީ އިތުރުވަމުން ދިއުމާއެކު، ޞިއްޙީ ޚިދުމަތުގެ ފެންވަރު ރަނގަޅުކޮށް، ކުއްލި ޙާލަތުގައި އިމަރޖެންސީކޮށް ފަރުވާ ދިނުމުގެ ޤާބިލުކަން އިތުރުކުރުމުމުގެ މުހިންމުކަން ރައީސް ފާހަގަކުރެވިފައިވެއެވެ. މިގޮތުން، ރައީސުލްޖުމްހޫރިއްޔާ ޑރ. މުޢިއްޒުގެ އިސްނެންގެވުމުގެ ދަށުން ނިއު ޕޮލިސީ އިނީޝިއޭޓިވްއެއްގެ ގޮތުގައި ހުޅުމާލޭ ހޮސްޕިޓަލުގެ އީ.އާރް އެކްސްޕެންޝަން ޕްރޮޖެކްޓު ހިންގުމަށް ނިންމުނެވެ.

މި މަޝްރޫޢުގެ ދަށުން، ކުރިން 7 އެނދު ހުރި އިމަރޖެންސީ ރޫމުގައި މިހާރު 14 އެނދު ވަނީ ޤާއިމުކުރެވިފައެވެ. އަދި ކްރިޓިކަލް ބަލިމީހުންނަށް ޚާއްސަ ފަރުވާ ދިނުމަށް ރިސަސިޓޭޝަން ރޫމެއްވެސް ވަނީ ތައްޔާރުކުރެވިފައެވެ. މި އައު އިމަރޖެންސީ ރޫމުގައި ޒަމާނީ މެޑިކަލް އާލާތްތައް ހިމެނޭއިރު، ފުރާނައަށް ނުރައްކާވާ ޙާލަތުގައި އަވަސް ފަރުވާ ދެވޭނެ އެންމެ ފުރިހަމަ ވަސީލަތްތައް ޤާއިމުކުރެވިފައިވާކަމަށް ހުޅުމާލެ ހޮސްޕިޓަލުން މަޢުލޫމާތު ދެއްވިއެވެ.

ހުޅުމާލެ ހޮސްޕިޓަލަކީ ހުޅުމާލޭގައި ހުރި ހަމައެކަނި ސަރުކާރު ހޮސްޕިޓަލުކަމުން، މި އައު އިމަރޖެންސީ ރޫމުގެ ސަބަބުން ހުޅުމާލޭގައި ދިމާވާ އެކްސިޑެންޓްތަކާއި އެހެނިހެން ކުއްލި ޙާލަތްތަކުގައި ބަލިމީހުންނަށް ފަރުވާ ދިނުމަށް ލިބޭނެ ލުއިފަސޭހަކަން ބޮޑުވެގެންދާނެއެވެ. މީގެ އިތުރުން، ހުޅުމާލެ ހޮސްޕިޓަލުގައި އައި.ސީ.ޔޫ، އެން.އައި.ސީ.ޔޫ އަދި އޯ.ޓީގެ ޚިދުމަތްވެސް މިހާރު ދެމުންދާކަން ފާހަގަކޮށްލެވެއެވެ.

ހުޅުމާލެ ހޮސްޕިޓަލް ޓަރޝަރީ ފެންވަރަށް ތަރައްޤީކުރުމުގެ މަސައްކަތްތައް ކުރިއަށްދާއިރު، މިދިޔަ ނޮވެމްބަރުމަހުގެ 16 ވަނަ ދުވަހު ވަނީ ގިނަ އައު ޚިދުމަތްތަކެއް ރަސްމީކޮށް ފަށާފައެވެ. މީގެ ތެރޭގައި 4 އޮޕަރޭޝަން ތިއޭޓަރު ހިމެނޭ ކޮމްޕްލެކްސްއަކާއި 10 އެނދުގެ އިންޓެންސިވް ކެއަރ ޔުނިޓު (އައިސީޔޫ)ގެ އިތުރުން ނިއޮނޭޓަލް އިންޓެންސިވް ކެއަރ ޔުނިޓެއް ވެސް ހިމެނެއެވެ.

ހުޅުމާލެ ހޮސްޕިޓަލުން ވިދާޅުވެފައިވަނީ، ޤައުމީ ޞިއްޙީ މިންގަނޑުތަކާ އެއްގޮތްވާ ގޮތުގެ މަތިން ޓަރޝަރީ ފެންވަރުގެ ޚިދުމަތްތައް ދެމެހެއްޓެނިވި ގޮތެއްގައި ރަނގަޅު ފެންވަރުގައި ރައްޔިތުންނަށް ފޯރުކޮށްދިނުމަކީ އެ ހޮސްޕިޓަލުގެ މައިގަނޑު އަމާޒެއް ކަމަށެވެ.